A Unidade de Psicoloxía Deportiva e Apoio á Investigación da Universidade de Santiago de Compostela (USC), en colaboración coa Universidade de Oviedo, está realizando un estudo sobre o compromiso co deporte. Para isto, están buscando a colaboración de deportistas federados maiores de 18 anos (sen distinción de deporte) que cubran un cuestionario pinchando no siguiente link ao estudo da USC.

Nestes cuestionarios preséntanse frases relacionadas coas experiencias no deporte, pensamentos e actitudes do deportista. Desde Galicia Saudable animamos a todos os deportistas federados a participar neste estudo, xa que consideramos que as conclusións do mesmo poden ser importantes á hora de fomentar o deporte e os hábitos de vida saudables e activos entre a poboación.

Máis información: Enquisa da USC

Publicado en Novas

O Concello de Oimbra será o lugar ao que chega este sábado 31 de maio o programa Eurorrexión activa: vida saudable nos concellos da raia. Esta vez a actividade programada é unha andaina saudable, chamada "Ruta dos Lagares", que terá a súa saída ás 09:30 horas desde a Avenida do Carregal, 3.

Esta ruta percorrerá os lagares rupestres deste municipio ourensán. Os lagares son as bases de prensas para o pisado da uva escavadas en afloramentos de roca natural; e andaina levará os participantes por varios destes lagares.

Entre outros beneficios, camiñar axuda a fortalecer o corazón (reducindo as probabilidades de complicacións cardiovasculares), mellora a función cognitiva, elimina o estrés, mellora o ánimo, combate a depresión, é bo para os ósos e prevé a diabetes tipo 2.

Esta actividade forma parte do proxecto Eurorrexión activa: vida saudable nos concellos da raia, da Dirección Xeral de Relacións Exteriores e a Unión Europea, en colaboración coa Secretaría Xeral para o Deporte e o Plan Galego para o Fomento da Actividade Física Galicia Saudable. Durante os vindeiros meses realizarase una ampla axenda de actividades saudables totalmente gratuítas para dinamizar a práctica de deportes saudables. Así, haberá andainas saudables, diversas master class, fitness nos parques saudables, paseos de BTT e diferentes conferencias en torno ao deporte e os beneficios do exercicio físico sobre a saúde.

Trátase dun proxecto financiado con fondos europeos que busca, a través da cooperación intermunicipal, promover hábitos de vida activa desde a  infancia ata a vellez, traballando conxuntamente por un envellecemento máis activo e saudable.

Con esta serie de accións preténdese que a poboación galega e portuguesa incorpore a actividade física ao seu día a día. A dose mínima de exercicio para un bo estado de saúde segundo a Organización Mundial da Saúde (OMS) é de 60 minutos ao día para os menores de idade e de 30 minutos ao día para os maiores de idade.

Publicado en Novas

A axenda de actividades de vida activa e saudable do programa "Eurorrexión Activa: vida saudable nos concellos da raia" arrancou onte sábado, 10 de maio, en Valença e Vila Nova de Cerveira coa actividade "Trilho Saudável da Eurocidade". Esta acción forma parte do proxecto do Plan Galicia Saudable, que tivo moi boa acollida por parte das Cámaras Municipais de Valença e Vila Nova de Cerveira.

A primeira hora da mañá un autobús partía de Valença ata Vila Nova de Cerveira para realizar unha senda de 10,5 km que descubría algún dos paraxes máis espectaculares desta vila de fronteira.

Desde o parque O Castelinho continuouse polo paseo fluvial para coñecer o castro de Lovelhe e a fortaleza do mesmo nome para logo internarse en Serra da Gávea e así alcanzar un tesouro da historia de fronteira: o "Fortim da Atalaia", cun exemplar de faia no seu interior, único no municipio. Tras esta parada, a andaina continuou por "Outeiro da Forca" baixo o alto de Espíritu Santo para regresar de novo ao punto de partida.

Dentro do programa "Eurorrexión activa", todos os participantes da andaina puideron gozar dunha sesión de estiramentos previa e posterior ao sendeirismo, pois comprenden unha parte importante no adestramento deportivo e producen considerables beneficios no organismo.

Publicado en Novas
O presidente do Goberno galego, Alberto Núñez Feijóo, avanzou que o vindeiro xoves o Consello da Xunta aprobará o Plan Xermola, orientado á prevención da obesidade xuvenil e infantil. "Poñeremos en colaboración a Educación pública e a Sanidade pública para, traballando todos xuntos, intentar diminuír o número de rapaces e rapazas con problemas de sobrepeso e de obesidade", asegurou. 

Durante a presentación do libro-guía para previr a obesidade infantil: Os bolechas educan a Pepiño Chispa; Feijóo precisou que o plan recollerá un conxunto de accións para inverter esta tendencia, e atenuar a prevalencia desta patoloxía entre a poboación infantil e xuvenil en Galicia, actuando en cinco áreas diferenciadas: a normativa, a participativa, desde a innovación e a investigación, desde a vixilancia e desde un plano informativo. 

O presidente autonómico subliñou que o obxectivo do plan será crear protocolos de intervención no ámbito sanitario e buscará, tamén, concienciar á sociedade na importancia da prevención, estimulando a participación e a implicación das familias, as institucións ou incluso as empresas. 

No campo da innovación e a investigación, as liñas de acción irán encamiñadas a impulsar a investigación sanitaria da obesidade infantil, coa colaboración das universidades. E, a área de vixilancia analizará patróns alimentarios e de actividade física entre os menores. 

Así mesmo, a estratexia informativo-formativa recollerá unha serie de accións destinadas a capacitar os profesionais sanitarios e os docentes na atención da obesidade, e a concienciar ás familias e á sociedade no seu conxunto sobre a importancia de manter hábitos de vida saudables. 

Feijóo explicou que esta iniciativa prevé, ademais, a creación de diversos grupos de traballo e un observatorio de nutrición en colaboración coa Axencia Española de Seguridade Alimentaria. 

O titular da Xunta lembrou, tamén, que estes obxectivos son compartidos co Plan Galicia Saudable, posto en marcha polo Goberno galego. "Pero, hoxe, queremos intensificar ese plan, para seguir con este problema e intentar así solucionalo", aseverou, logo de subliñar que en Galicia un 26 % dos nenos de entre 6 e 12 anos ten sobrepeso e un 9% deles padece obesidade (o que significa que na Educación Primaria un 35% dos escolares padece algunha destas afeccións. 

Así mesmo, cómpre resaltar que un 6 % dos nenos entre os 12 e os 16 anos sofre obesidade e un 23 % supera o peso medio recomendado. 

Unha boa alimentación e practicar exercicio físico
Diante destas cifras, e tendo en conta que a obesidade e o sobrepreso son factores de risco para o desenvolvemento doutras enfermidades crónicas como a diabetes ou as cardiopatías, e son tan prexudiciais como o tabaquismo ou a hipertensión; Feijóo referiuse á presentación deste libro-guía como un proxecto pedagóxico que busca concienciar aos máis pequenos na importancia de levar unha boa alimentación e de practicar exercicio físico para manter unha vida sa. “E, faino –explicou-, a través dun conto que ten como protagonistas a popular familia ideada polo ilustrador Pepe Carreira, Os Bolechas, uns personaxes de sobra coñecidos polos máis cativos”. Esta nova andaina dos irmáns Bolechas será distribuída en centros educativos, hospitais e bibliotecas. 

Por último, Feijóo salientou que esta iniciativa é resultado do convenio asinado pola Consellería de Sanidade, a Unión de Consumidores e o Foro Interalimentario; e insistiu en que abordar o problema da obesidade infantil implica que a educación se poña ao servizo da sanidade para incidir nun factor fundamental co que poñerlle freo: a prevención desde a infancia. 

Publicado en Novas
O xurado dos Premios do Deporte Galego 2013, presidido polo secretario xeral para o Deporte, José Ramón Lete Lasa, reuniuse o luns para determinar os deportistas e as entidades merecedores nesta edición destes galardóns anuais, cos que a Xunta recoñece a aqueles axentes que nos últimos doce meses destacaron de modo especial na súa contribución ao deporte galego.

Lete Lasa mostrou a súa satisfacción polos amplos méritos acadados polos premiados e agradeceu a participación das federacións, dos clubs, dos concellos e de todas as entidades que achegaron as súas propostas de candidaturas nas dezasete categorías. 

O secretario xeral anunciou que este ano o acto de entrega dos galardóns terá lugar o vindeiro 20 de marzo ás sete da tarde na Cidade da Cultura de Galicia, en Santiago. O evento, unha das citas anuais máis importantes do deporte galego, xunto coas Distincións ao Mérito Deportivo de Galicia, estará presidido polo titular da Xunta, Alberto Núñez Feijóo. 

Esta é a listaxe dos premiados na presente edición:

Premio á mellor deportista feminina: Beatriz Gómez Cortés (natación).

Premio á mellor deportista feminina con discapacidade: Susana Rodríguez Gacio (tríatlon).

Premio ao mellor deportista masculino: Javier Gómez Noya (tríatlon).

Premio ao mellor deportista masculino con discapacidade: Maxi Rodríguez Magi (atletismo).

Premio ao mellor equipo feminino: CD Burela FS (fútbol sala).

Premio ao mellor equipo masculino: Obradoiro CAB (baloncesto).

Premio ao mellor equipo de deportistas con discapacidade: Selección Nacional Júnior: Martín de la Puente, Félix García, Lorenzo Hernández (tenis).

Premio á mellor entidade na promoción do deporte de base: Seis do Nadal.

Premio ao mellor adestrador/a: Carlos Gil (hóckey).

Premio ao mellor árbitro/a –xuíz/a: Miguel Vicente Mariño (ximnasia en trampolín).

Premio ao mellor labor informativo: Radio Galega.

Premio ao mellor evento deportivo: XXV Trofeo Miguelito.

Premio patrocinio deportivo: Frigoríficos del Morrazo, S.A.

Premio revelación: María Vilas Vidal (natación).

Premio Galicia Saudable á entidade de carácter público destacada no fomento e promoción da actividade física e hábitos de vida activa: Concello do Porriño.

Premio Galicia Saudable á entidade de carácter privado destacada no fomento e promoción da actividade física e hábitos de vida activa: Fundación USC Deportiva.

Premio Galicia Saudable á entidade educativa destacada no fomento e promoción da actividade física e hábitos de vida activa: CPI de Pontecesures.

Mencións: Mecalia Atlético Guardés (balonmán). Ribadeo F.C. (fútbol). 


Publicado en Novas

A Secretaría Xeral para o Deporte abre a convocatoria de propostas para os Premios Deporte Galego de 2013. Ademais das categorías de clubs e deportistas, concederanse tres premios Galicia Saudable:

- Premio Galicia Saudable á entidade de carácter público destacada no fomento e promoción da actividade física e hábitos de vida activa. 

- Premio Galicia Saudable á entidade de carácter privado destacada no fomento e promoción da actividade física e hábitos de vida activa.

- Premio Galicia Saudable á entidade educativa destacada no fomento e promoción da actividade física e hábitos de vida activa.

Pódense consultar as bases e descargar os anexos e modelos de proposta no DOG do 7 de febreiro de 2014.

Publicado en Novas
O Plan Galego para o Fomento da Actividade Física Galicia Saudable, a través da Secretaría Xeral para o Deporte e a Fundación Deporte Galego (Xunta de Galicia), celebra o vindeiro sábado 8 de febreiro a segunda edición do curso de formación da plataforma de Datos de Actividade Física Saudable –DAFIS. Terá lugar no CIFP Politécnico de Santiago de Compostela. 

O curso vai dirixido a profesores de Educación Física dos centros participantes no Plan Proxecta de Innovación Educativa da Consellería de Cultura, Educación e Ordenación Universitaria.

O obxectivo desta xornada é dar a coñecer o funcionamento da plataforma dixital de valoración da condición física saudable DAFIS, así como dominar os protocolos e tests propostos para a valoración da condición física saudable nos centros educativos a través desta plataforma dixital. Tamén se pretende establecer unha metodoloxía de implantación dos protocolos de valoración nos centros educativos e a súa relación co Proxecto Deportivo de Centro. 

O programa comeza cunha introdución sobre o programa DAFIS, Galicia Saudable e o Plan Proxecta a cargo de Laura Mosquera Escudero, subdirectora xeral de Programas da Secretaría Xeral para o Deporte. 

Eliseo Iglesias Soler, doutor en Educación Física e profesor na Universidade da Coruña, explicará os fundamentos dos protocolos de valoración. Este, xunto a Javier Castro Gacio, licenciado en Ciencias da Actividade Física e do Deporte e profesor da Universidade da Coruña, encargarase de dar a coñecer as recomendacións, materias e aspectos a ter en conta á hora de levar a cabo os protocolos.

Por último, José Máximo Fernández López, licenciado en informática, explicará o funcionamento da plataforma informática (estrutura en funcionamento interno).
Publicado en Novas
As incorporacións ao Plan Galicia Saudable seguen crecendo, e o Plan conta xa co 90% dos concellos galegos adheridos á Declaración de Galicia Saudable. Por provincias Lugo lidera as adhesións, co 98,51%; A Coruña conta co 89,36%; Pontevedra, co 87,10%, e Ourense, co 86,96%. En total son 284 concellos galegos adheridos, formando unha grande rede de promotores de saúde a través de actividade física, exercicio físico e deporte. Esta rede compleméntase ata chegar a 436 entidades adheridas con empresas, medios de comunicación, deputacións, FEGAMP, as 3 universidades galegas e federacións deportivas e clubes.

A maiores, 228 centros educativos escolares participan en programas de fomento da actividade física saudable, a través de programas de innovación educativa, nunha acción conxunta entre Galicia Saudable e o Plan Proxecta, da Consellería de Cultura, Educación e Ordenación Universitaria.

Galicia é cada día máis SaudableMóvete pola túa saúde


Publicado en Novas
O Plan Galicia Saudable, da man do Secretario Xeral para o Deporte, José Ramón Lete Lasa, será un dos temas que se tratarán nas II Xornadas Nacionais de Nutrición, Exercicio Físico e Saúde que terán lugar mañá mércores 18 de decembro na Coruña. Esta conferencia forma parte do I Forma Sportis Solidario, que se celebra na Facultade de Ciencias da Educación (Campus Universitario de Elviña).

"Galicia Saudable: unha estratexia transversal e integral para unha Galicia máis activa" é o título da intervención de Lete Lasa, quen explicará a importancia de levar a cabo políticas que promovan a práctica de actividade física coa fin de gañar saúde e reducir as taxas de obesidade e sobrepeso. Numerosos estudos asocian a insuficiente actividade física como unha das causas principais das enfermidades con maior impacto na actualidade, como son as patoloxías cardiovasculares, a diabetes, a hipertensión arterial, a obesidade, o cancro, as enfermidades mentais e as afeccións de ósos e articulacións. A Xunta de Galicia pretende, a través deste plan, reducir o sedentarismo na nosa comunidade.

Haberá un total de 8 conferencias plenarias (8 horas de formación). Entre outros, intervirá tamén o profesor da Universidade de Vigo José Luis García Soidán, quen abordará o tema da nutrición e a hidratación no deporte. Este mesmo aspecto, pero na infancia, será o que tratará a profesora Marian Figueiras Martínez, da Universidade Alfonso X El Sabio (Madrid). Pola súa banda, Luis Ráfales Loureiro, do CIFP Ánxel Casal Motealto, centrarase na nutrición e hidratación na vida adulta.

"Baixo presión: a sociedade apresurada e a saúde da infancia" é o tema que o profesor da Universidade da Coruña Raúl Fragueda Vale tratará. Pola súa parte, Rafael Martín Acero, da Universidade da Coruña e membro do Comité de Expertos do Plan Galicia Saudable, falará sobre "A actividade física: dilemas, mitos e realidades para crear hábitos saudables".

Noutra banda, José Palacios Aguilar, profesor da Universidade da Coruña, incidirá na importancia dos primeiros auxilios para a vida. Por último, Víctor Arufe Giráldez, da Universidade da Coruña, falará sobre "A construción do deportista desde a infancia. As escolas de psicomotricidade".

A inscrición é gratuíta e poderá facerse ata o 15 de decembro. As prazas son limitadas. Os asistentes deberá levar 1 quilo de alimentos por cada hora de formación. Todos os alimentos recadados será doados ao Banco de Alimentos Rías Altas. 8 conferencias plenarias = 8 horas de formación = 8 quilos de alimentos. 

Máis información no teléfono 657 459 795, no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo ou na páxina web www.sportis.es.
Publicado en Novas
Venres, 13 Decembro 2013 08:04

CURSO PLATAFORMA DAFIS

O vindeiro sábado 14 de decembro, celebrarase nas instalacións do C.I.F.P. Politécnico de Santiago de Compostela o primeiro curso de formación para o profesorado participante nos programas de fomento de actividade fisica saudable en centros educativos escolares (integrados no Plan Proxecta, de innovación educativa, da Consellería de Cultura, Educación e Ordenación Universitaria) sobre a Plataforma de Datos de Actividade Física Saudable - D.A.F.I.S.

A Plataforma D.A.F.I.S. é unha inicicativa do Plan Galicia Saudable, en colaboración co Plan Proxecta, e a Axencia para a Modernización Tecnolóxica de Galicia (AMTEGA) concibida como unha ferramenta para os profesionais da actividade física e do deporte, desenvolta nunha aplicación informática que permite ao profesorado unha xestión eficaz dos datos do seu alumnado sobre a súa condición física saudable, facilitándolle unha información de calidade para unha posterior toma decisións tanto nas súas clases de educación física coma noutras actividades de promoción da saúde a través da practica regular de  actividade física que realice tanto en actividades escolares como extraescolares.

O longo do día os/as profesores/as poderán coñecer tanto os distintos test e protocolos seleccionados na plataforma  como o seu funcionamento interno. As inscricións centralízanse a través do portal educativo da Consellería de Cultura, Educación e Ordenación Universitaria -  fprofe.
Publicado en Novas
<< Inicio < Anterior 1 2 3 Seguinte > Final >>
Páxina 1 de 3