"Promoción da Actividade Física e Deportiva entre os escolares de Galicia no ámbito do Plan Galicia Saudable". Este é o título da conferencia inaugural do IV Congreso Mundial do Deporte Escolar. Seminario Internacional de Educación Física, Escolas Deportivas e Psicomotricidade, que se celebrará os días 5, 6 e 7 de novembro na Facultade de Ciencias da Educación da Coruña. José Ramón Lete Lasa, secretario xeral para o Deporte, será o encargado de expoñer a importancia da práctica de actividade física en idade escolar.

Este encontro intentará reunir a preto de 400 profesionais da iniciación deportiva, co obxectivo de crear estratexias que favorezan a práctica deportiva, melloren a calidade desta e eviten o abandono deportivo.

O congreso está aberto a estudantes, deportistas, técnicos deportivos, docentes, investigadores, psicomotricistas, e calquera persoa que se sinta atraída por estes ámbitos.  

Ademais da conferencia de José Ramón Lete Lasa, o programa componse de numerosas mesas redondas e obradoiros con especialistas dos ámbitos deportivo e escolar. O programa completo do congreso pode consultarse nesta páxina web.

Por outro lado, o prazo de presentación de traballos finaliza o próximo 5 de outubro. Haberá premios económicos para a mellor comunicación, póster e póster virtual. Todos os traballos serán incorporados a un CD de actas coa súa correspondente ISBN e D.L. A organización seleccionará entre 5-10 traballos para a súa proposta de publicación na Revista técnico-científica RETOS.

O evento está organizado polo Departamento de Didácticas Específicas da Universidade da Coruña e Sportis Formación Deportiva, en colaboración coa Facultade de Ciencias da Educación, a Secretaría Xeral para o Deporte da Xunta de Galicia e o Concello da Coruña, e conta co patrocinio da Deputación da Coruña.  

Máis información e inscricións en www.sportis.es

Publicado en Novas

A Axencia Española de Consumo, Seguridade Alimentaria e Nutrición (AECOSAN) convoca os VIII Premios Estratexia NAOS, edición 2014. Con estes premios pretende recoñecer e divulgar  programas ou proxectos enmarcados nos obxectivos da Estratexia para a Nutrición, Actividade Física e prevención da Obesidade (Estratexia NAOS) e que son: fomentar unha alimentación saudable e/ou o incremento da actividade física. 

Así, ao igual que en convocatorias anteriores, poderán optar ao premio programas relacionados coa promoción da alimentación saudable e/ou da actividade física en calquera ámbito: familiar e comunitario, escolar, laboral, sanitario e empresarial. Na edición pasada, o Plan Galicia Saudable foi galardoado cun primeiro accésit na modalidade "Promoción da práctica da actividade física no ámbio escolar". 

Como en anos anteriores a concesión destes premios pretende impulsar as iniciativas que entre os seus obxectivos básicos impulsen a prevención da obesidade e outras enfermidades crónicas derivadas, a través dunha alimentación saudable e a práctica regular de actividade física e, por tanto, son un medio para recoñecer e dar visibilidade a aquelas accións ou programas desenvolvidos no marco dos obxectivos da Estratexia NAOS.

Poderanse presentar tanto proxectos novos, como proxectos ou programas que foran presentados noutras convocatorias dos Premios Estratexia NAOS, pero que non foran premiados, se continúan desenvolvéndose.

A data límite para presentar as solicitudes é o 19 de decembro de 2014, incluído. 

Os interesados poden encontrar máis información sobre os Premios Estratexia NAOS, así coma descargar o formulario de presentación de candidatura, na páxina web de AECOSAN ou no correo electrónico:  Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo

Publicado en Novas

O secretario xeral para o Deporte, José Ramón Lete Lasa, o reitor da USC Juan Viaño e o Catedrático da USC Constantino Arce, presentaron esta mañá os resultados da enquisa sobre Hábitos de actividade física e deportiva da poboación galega. Estudo de Poboación 2013, realizada pola Secretaría Xeral para o Deporte en colaboración coa Fundación Deporte Galego e a Universidade de Santiago de Compostela (USC).

No transcurso do acto celebrado na institución académica, o secretario xeral para o Deporte manifestou a súa satisfacción porque o estudo demostra que “na nosa sociedade ten calado a identificación da práctica deportiva coa calidade de vida, coa saúde, co benestar físico e psíquico” e puxo como exemplo o feito de que, segundo o estudo presentado hoxe, o 70,75% dos galegos maiores de 18 anos (7 de cada 10) teñen o hábito de realizar actividade física polo menos unha vez á semana durante o seu tempo libre, o que supón un avance de 15,65 puntos respecto ao nivel do ano 2007.

Lete Lasa asegurou que os positivos datos desta enquisa realizada no último trimestre de 2013 anima ao goberno galego "a seguir a traballar na política de xeneralización da actividade física e o deporte no noso país como ferramenta de saúde", o que precisamente é o obxectivo prioritario da Secretaría Xeral para o Deporte e que se desenvolve a través do Plan Galicia Saudable, no que conflúen esforzos de todos os departamentos da Xunta así como doutras institucións públicas e privadas da comunidade.

O secretario xeral destacou que se ben en tempos pasados a meirande parte das actuacións  e orzamentos das administracións nesta materia encamiñábanse ao tecido deportivo, ás competicións e ás instalacións, na actualidade "o eixo esencial de calquera política deportiva céntrase na xeneralización da actividade entre todos os grupos de poboación, logo das evidencias científicas sobre os beneficios do deporte e da actividade física sobre a saúde". Por iso, engadiu, "queremos seguir crecendo en practicantes e en frecuencia, porque o noso horizonte está en cada un dos galegos e galegas".

Principias datos da enquisa
O estudo, no que participaron 1.200 persoas de toda a comunidade, de ambos sexos e maiores de 18 anos, é unha das accións do Plan Galicia Saudable e realizouse co fin de comezar a avaliar os obxectivos da posta en marcha deste programa interdepartamental da Xunta, que coordina a Secretaría Xeral para o Deporte e ao cal se adheriron xa 496 entidades de Galicia.

Ademais do incremento da práctica deportiva en case 16 puntos con respecto ao ano 2007, o estudo amosa bastante igualdade entre as catro provincias e que, se ben hai unha maior porcentaxe de homes que practica (73,74%) que de mulleres (68%), esta diferenza se reduciu en case 2 puntos con respecto ao ano 2007, xa que desde entón a porcentaxe de mulleres que fan deporte aumentou nun 16,8%, fronte ao 14,84% no caso dos homes.

Por tramos de idade, o maior incremento na práctica deuse na franxa dos 65 aos 74 anos, cun 26,1%.

A actividade física máis practicada polos galegos é camiñar, un hábito para o 40,42% dos  maiores de 18 anos, é dicir, algo máis de 4 de cada 10, moi por riba das demais prácticas. Esta porcentaxe ascendeu notablemente desde 2007, cando era do 27,47 %.

Descontando a actividade de camiñar e considerando só as persoas de entre os 18 aos 70 anos e que practican máis dunha vez por semana, a porcentaxe de práctica físico deportiva en Galicia é do 41,9%, situándose lixeiramente por riba da media española, que é de 41, 8% para as mesmas condicións (SporCvltvra Barcelona, 2013).

En relación coa frecuencia e duración das sesións de actividade física, os galegos, por termo medio, realizan unha media de 4,15 sesións de exercicio semanal e dedícanlle 78,25 minutos a cada unha delas, o que significa que invisten unha media de 324,74 minutos semanais, superando amplamente as recomendacións mínimas da Organización Mundial da Saúde (OMS), que son de 150 minutos de actividade física semanal moderada.

As dez actividades máis practicadas polos galegos/as maiores de 18 anos, e por orde de maior a menor porcentaxe de practicantes, son: camiñar (40,42%), acondicionamento físico en ximnasio (8,33%), correr (7,83%), ximnasia de mantemento (5,42%), actividades aerobias con soporte musical (5,42%), nadar (5 %), andar en bicicleta (4%), fútbol (4%), Pilates (3%) e pádel (2,42%).

Con respecto á evolución na orde de práctica desde 2007 a 2013, camiñar mantén o primeiro posto e ademais é a actividade que máis ascende entre as dez primeiras. Melloran as súas posicións relativas o acondicionamento físico en ximnasio, correr, ximnasia de mantemento, actividades aerobias con soporte musical e andar en bicicleta e, por primeira vez, Pilates e  pádel incorpóranse á listaxe dos dez primeiros postos. Pola súa parte, nadar e fútbol perden peso relativo, mentres que fútbol sala e pesca saen desta táboa.

En relación co efecto positivo do exercicio físico na saúde mental das persoas, o estudo reflicte que as que practican actividade física regular no seu tempo libre considéranse en mellor forma física e cun mellor estado de saúde, e séntense máis felices e satisfeitas na vida que as que non realizan exercicio físico regular.

Publicado en Novas
O Concello de Avión organiza a sexta edición da Andaina Popular "Entre Montañas". Esta actividade terá lugar o próximo domingo 6 de xullo. A saída da mesma será ás 08:30 horas desde a Igrexa Parroquial de Amiudal, aínda que será obrigatorio chegar 30 minutos antes. 

Vaise realizar unha distancia aproximada de 21,5 km de forma circular. O perfil da proba pódese considerar de dificultade media, tendo unha pendiente media de 8.2% de subida e -9.5% de baixada. Tamén haberá a posibilidade de facer a ruta máis curta, de 8 e 15 km aproximadamente, para aqueles participantes con mobilidade reducida. Para realizar esta ruta haberá que solicitala no momento da inscrición. 

As inscricións poderán realizarse directamente no Concello de Avión, na Biblioteca, na Casa da Cultura ou no Polideportivo Municipal. O prezo da inscrición é de 20 euros e dará dereito a unha camiseta conmemorativa, avituallamentos, comida, postre e bebida. O número de prazas é limitado, podendo reunir a un máximo de 120 participantes. A data límite de inscrición remata o 3 de xullo (inclusive). Os participantes que se incriban fóra da data límite de inscrición deberán pagar 25 euros como penalización.
Publicado en Novas

O Plan Galicia Saudable da Xunta de Galicia foi galardoado co primeiro accésit na modalidade "Promoción da práctica da actividade física no ámbito escolar" na última edición dos Premios Estratexia Naos 2013 que concede o Ministerio de Sanidade e Consumo, a través da Axencia Española de Seguridade Alimentaria e Nutrición (AESAN), e que sae publicado no Boletín Oficial do Estado do 20 de xuño.

Con esta distinción, recoñécese o labor da Administración Pública galega na loita contra a alta taxa de sedentarismo, obesidade e sobrepeso infantil. As sinerxías xeradas entre Galicia Saudable e o Plan Proxecta, de Innovación Educativa da Consellería de Cultura, Educación e Ordenación Universitaria, para achegar aos escolares galegos unha nova forma de entender a práctica deportiva, o exercicio físico e o deporte deron o seu froito con este galardón por parte do Ministerio de Sanidade e Consumo.

Os programas de Proxecto Deportivo de Centro  (xerme das Unidades de Promoción de Exercicio Físico Saudable Escolares), Máis e Mellor Actividade Física (o incremento da carga/consumo de actividade física no horario lectivo, a través dunha hora compartida entre Coñecemento do Medio e Educación Física, desenvolvendo programas e actividades con coñecementos compartidos de ambas materias  e a través da actividade física) e Xogade (Xogos Deportivos Galegos en Idade Escolar) son as accións principais que Galicia Saudable realiza nos centros educativos a través do traballo de proxectos de innovación educativa (Proxecta) e que foron premiadas pola Estratexia Naos.

Ademais, Galicia Saudable centrouse na formación de profesionais da educación e a actividade física a través da Plataforma DAFIS (Plataforma de Datos de Actividade Física Saudable), unha  ferramenta que permite ao profesorado unha xestión eficaz dos datos do seu alumnado sobre a avaliación da condición física saudable, facilitándolle unha información de calidade para unha posterior toma de decisións tanto nas aulas de Educación Física como noutras actividades de promoción da saúde a través da práctica regular de actividade física que realice tanto en actividades escolares como extraescolares. 

Estratexia NAOS naceu co obxectivo de sensibilizar á poboación do problema que a obesidade representa para a saúde e de impulsar todas as iniciativas que contribúan a lograr que os cidadáns, e especialmente os nenos e a xente nova, adopten hábitos de vida saudables, principalmente a través dunha alimentación saudable e da práctica regular de actividade física.

O Plan Galicia Saudable, coordinado pola Secretaría Xeral para o Deporte e de carácter eminentemente interdepartamental, atópase no seu terceiro ano de implementación. Desde os seus inicios ata a data, 496 entidades  tense adherido ao Plan, co obxectivo común de incrementar a práctica de actividade física e deportiva entre a poboación galega como ferramenta de saúde e calidade de vida. Entre elas figuran 285 concellos, 26 federacións deportivas, 26 empresas, 53 centros educativos e as 3 Universidades.

Consulta aquí a resolución do BOE

Publicado en Novas
Eurorrexión Activa: vida saudable nos concellos da raia continúa a súa programación. Desta vez o atletismo, o tenis, o balonmán praia e as bicicletas son os verdadeiros protagonistas destas xornadas. 

O sábado 21 de xuño a Cámara Municipal de Caminha (Portugal) acollerá a  IV Regata Noroeste Ibérico de Veleiros

Tamén o sábado a Eurocidade Verín-Chaves acollerá unha master class de atletismo por parte do equipo nacional New Balance.  

Pola súa parte, o Concello de Tomiño acolle o sábado e domingo unhas xornadas de balonmán praia. Outro municipio baixomiñoto, desta vez Tui, será o escenario do I Torneo de Tenis Eurocidade

Na cidade tudense celebrarase o domingo 22 de xuño a segunda edición do Gran Premio Ciclista "Cidade de Tui", unha proba que terá un percorrido de 80 km e cuxa saída terá lugar ás 11:30 horas desde o Paseo da Corredoira.  

Na outra beira do río, en Valença (Portugal) terá lugar o domingo unha xornada deportiva para todos os públicos, tamén en bicicleta, coa mañá saudable "Pedalar em família"

As bicicletas tamén estarán presentes este domingo na Mancomunidade Terra de Celanova coa VI Ruta BTT Terra de Celanova. Esta proba terá un percorrido próximo aos 40 km e sairá desde o municipio de Quintela de Leirado.

Todas estas actividades forman parte do programa Eurorrexión activa: vida saudable nos concellos da raia, un proxecto impulsado polo Plan Galicia Saudable da Xunta de Galicia co que se quere fomentar a actividade física entre todos os grupos de idade da comunidade co fin de gañar saúde.
Publicado en Novas
Unha andaina saudable na Eurocidade Tui-Valença e unha carreira popular solidaria en Tomiño son as citas que o programa Eurorrexión Activa: vida saudable nos concellos da raia ten programadas para esta fin de semana nestes municipios da comarca do Baixo Miño.

Así, a Eurocidade acolle a andaina saudable "Mosteiró", que se desenvolverá pola Cámara Municipal de Valença o sábado 14 de xuño. A saída farase ás 10:00 (hora española) desde o Convento de Mosteiró (cun punto de encontro alternativo no Lidl de Valença ás 09:45 horas). A distancia da andaina será de 12 quilómetros, cunha duración aproximada de catro horas e media nun percorrido de dificultade baixa. Esta actividade é totalmente gratuíta.

Xa o domingo 15 de xuño, terá lugar a sexta edición da Carreira Popular de Amorín, en Tomiño. A saída farase desde a igrexa parroquial de Amorín ás 11:00 horas e os dorsais poderán retirarse unha hora antes da proba. O prezo da inscrición será de 3 euros para a carreira absoluta e de 0,50 euros para o resto de categorías. A recadación total donarase de maneira íntegra ao programa de supervivencia infantil de Unicef en Níxer.

Estes eventos deportivos forman parte do calendario de actividades de Eurorrexión Activa: vida saudable nos concellos da raia, un programa promovido polo Plan Galicia Saudable da Xunta de Galicia que promove os hábitos de vida activa e saudable desde a infancia ata a vellez.
Publicado en Novas

Percorrer a vila en bicicleta á vez que se fai exercicio físico. Esta é a esencia da actividade que o programa Eurorrexión Activa: vida saudable nos concellos da raia organiza o sábado 31 de maio, a partir das 17:00 horas, no Concello da Guarda. A actividade está dirixida a todos os membros das familias, posto que a ruta programada é accesible a todos os públicos, desde os máis cativos ata os maiores. A marcha ciclista sairá desde a Alameda e percorrerá as principias rúas do concello guardés.

Ademais de achegar beneficios para a saúde, facer deporte en familia e en grupo axuda a mellorar a autoestima, evita o sedentarismo, crea boas canles de comunicación entre os integrantes do círculo familiar e permítelles estar activos, entre outros aspectos positivos.

Concretamente, andar en bicicleta non só reduce o risco de infarto nun 50%, senón que ademais prevén dolores de costas, protexe as articulacións e repercute positivamente no sistema inmunolóxico.

Esta actividade encádrase dentro do proxecto Eurorrexión Activa: vida saudable nos concellos da raia, que conta cunha ampla axenda de actividades para realizar desde este mes de maio e ata agosto, totalmente gratuítas, en concellos de ambos lados da fronteira. Así, haberá andainas, diversas master class, fitness nos parques saudables, paseos de BTT e diferentes conferencias en torno ao deporte e os beneficios do exercicio físico sobre a saúde.

Este programa coordínase a través da Dirección Xeral de Relacións Exteriores e a Unión Europea en colaboración coa Secretaría Xeral para o Deporte e o Plan Galego para o Fomento da Actividade Física Galicia Saudable, que busca, por medio da cooperación intermunicipal, promover hábitos de vida activa desde a infancia ata a vellez, traballando conxuntamente por un envellecemento máis activo e saudable.

Con esta serie de accións preténdese que a poboación galega e portuguesa incorpore a actividade física ao seu día a día. A dose mínima de exercicio para un bo estado de saúde segundo a Organización Mundial da Saúde (OMS) é de 60 minutos ao día para os menores de idade e de 30 minutos ao día para os maiores de idade.

Publicado en Novas

Incorporar hábitos de vida saudables é un dos obxectivos do programa Eurorrexión Activa: vida saudable nos concellos da raia. Diferentes estudos e profesionais da saúde sinalan o binomio alimentación-exercicio físico como a clave do éxito para conseguir un envellecemento saudable e mellorar en calidade de vida. Por iso, este venres 30 de maio terá lugar no Concello da Gudiña un coloquio sobre cociña deportiva.

A actividade, que terá lugar ás 19:00 horas na Casa da Viúva, tratará de achegar aos veciños as principais pautas de alimentación para unha vida saudable. Ademais, explicarase con detalle en que consiste a nutrición deportiva para que aquelas persoas que realizan maiores doses de exercicio saiban que alimentos incorporar á súa rutina.

A encargada de dar as pautas de alimentación axeitadas será a nutricionista e adestradora persoal Natalia Carrillo. A entrada para o relatorio é gratuíta.

O ideal é seguir unha dieta variada e equilibrada na que o corpo poida sacar o mellor de cada nutrinte. E se logo se vai facer unha actividade deportiva, aconséllase comer forte unhas horas antes da práctica da mesma. Non hai que esquecer que os tipos de alimentos variarán segundo ese adestramento sexa pola mañá ou pola tarde.

Pero non só a alimentación é importante, senón tamén unha correcta hidratación. A auga é fundamental, tanto durante a realización dos exercicios coma no resto do día.

Esta charla encádrase dentro do proxecto Eurorrexión Activa: vida saudable nos concellos da raia, que conta cunha ampla axenda de actividades para realizar desde este mes de maio e ata agosto, totalmente gratuítas, en concellos de ambos lados da fronteira. Así, haberá andainas, diversas master class, fitness nos parques saudables, paseos de BTT e diferentes conferencias en torno ao deporte e os beneficios do exercicio físico sobre a saúde.

Este programa coordínase a través da Dirección Xeral de Relacións Exteriores e a Unión Europea en colaboración coa Secretaría Xeral para o Deporte e o Plan Galego para o Fomento da Actividade Física Galicia Saudable, que busca, por medio da cooperación intermunicipal, promover hábitos de vida activa desde a infancia ata a vellez, traballando conxuntamente por un envellecemento máis activo e saudable.

Con esta serie de accións preténdese que a poboación galega e portuguesa incorpore a actividade física ao seu día a día. A dose mínima de exercicio para un bo estado de saúde segundo a Organización Mundial da Saúde (OMS) é de 60 minutos ao día para os menores de idade e de 30 minutos ao día para os maiores de idade.

Publicado en Novas

A través de exercicios básicos para estimular a práctica deportiva, o programa Eurorrexión Activa: vida saudable nos concellos da raia chega este venres 30 de maio ao Concello do Rosal. No Parque do Tamuxe, a partir das 17:00 horas, terá lugar unha nova actividade orientada a lograr unha mellor calidade de vida nas persoas promovendo a práctica deportiva.

Os asistentes a esta clase de fitness nun parque saudable aprenderán a sacarlle un mellor rendemento a estes espazos, xa que se realizarán exercicios cos aparellos do parque. Ensinarase como usalos de maneira correcta coa fin de evitar lesións no uso dos mesmos e conseguir bos resultados no adestramento.  

Os circuítos deportivos comezan a ocupar espazos públicos, facilitando á poboación o acceso a actividades físicas moderadas que repercuten na mellora da calidade de vida dos habitantes, así coma no benestar físico e mental. Por iso, clases como a que se celebrará no Rosal resultan imprescindibles para o óptimo aproveitamento das instalacións, así como unha guía do uso seguro e da planificación do adestramento con estes aparellos.

Esta clase encádrase dentro do proxecto Eurorrexión Activa: vida saudable nos concellos da raia, que conta cunha ampla axenda de actividades para realizar desde este mes de maio e ata agosto, totalmente gratuítas, en concellos de ambos lados da fronteira. Así, haberá andainas, diversas master class, fitness nos parques saudables, paseos de BTT e diferentes conferencias en torno ao deporte e os beneficios do exercicio físico sobre a saúde.

Este programa coordínase a través da Dirección Xeral de Relacións Exteriores e a Unión Europea en colaboración coa Secretaría Xeral para o Deporte e o Plan Galego para o Fomento da Actividade Física Galicia Saudable, que busca, por medio da cooperación intermunicipal, promover hábitos de vida activa desde a infancia ata a vellez, traballando conxuntamente por un envellecemento máis activo e saudable.

Con esta serie de accións preténdese que a poboación galega e portuguesa incorpore a actividade física ao seu día a día. A dose mínima de exercicio para un bo estado de saúde segundo a Organización Mundial da Saúde (OMS) é de 60 minutos ao día para os menores de idade e de 30 minutos ao día para os maiores de idade.

Publicado en Novas
<< Inicio < Anterior 1 2 3 4 5 6 7 Seguinte > Final >>
Páxina 1 de 7