Xoves, 26 Febreiro 2015 06:38

Exercicio contra o cansazo

Realizar exercicio físico e levar a cabo actividades gratificantes aínda que ao principio custo un pouco, xunto a aceptar a axuda dos demais e a ter unha actitude positiva, son algúns dos consellos que poden servir ás persoas diagnosticadas de cancro a sobrelevar o cansazo que lles produce esta enfermidade. A fatiga é unha das manifestacións máis frecuentes e que máis preocupa aos pacientes oncolóxicos, xa que a sofren oito de cada dez con cancro en tratamento con quimioterapia ou radioterapia.

O cancro e o seu tratamento provoca nos que o padecen unha debilidade xeneralizada. Desde a Fundación Grupo IMO (Instituto Madrileño de Oncoloxía), e co decálogo Actívate polo cancro, perséguese que os que se enfrontan aos problemas físicos e psicolóxicos asociados ao cancro vaian máis alá do diagnóstico e leven unha vida activa para que poidan volver con máis facilidade a súa rutina habitual e eviten o sedentarismo. A idea é ofrecer consellos para minimizar o cansazo durante a enfermidade e os tratamentos porque a fatiga "non é algo tan raro nin tan anormal e non desaparece tan facilmente coma cando estamos sans", apunta a directora desta fundación, Carmen Yélamos.

Neste cansazo, moi frecuente, pero pouco diagnosticado, vense involucrados factores que interrelacionan entre eles, coma o tipo e estadio de tumor, a clase e duración do tratamento oncolóxico ou as características do propio paciente. "Unha cascada de respostas orgánicas nas que se ven implicados os nosos sistemas inmunitario, neuroendocrino e central, que dan lugar a esta fatiga", explica María Ángeles Gajete, especialista en Oncoloxía Médica do Grupo IMO. O medo a cansarse é o único que impide que os pacientes intenten facer a vida "o máis normal posible", como comenta unha das pacientes, Virginia Arrate, que insta a "normalizar" a enfermidade do cancro. "Non podo e enriba non me centro" é unha sensación repetida en todos os casos.

Un efecto secundario que xera factores psicolóxicos coma os problemas do sono, ansiedade ou baixo estado de ánimo, que xogan un papel importante no mantemento da fatiga. Ana Sanz, psicooncóloga da Fundación Grupo IMO considera que "o cansazo que poden experimentar estes pacientes adoita levar un abandono de actividades, a veces illamento social e por tanto un malestar emocional continuo".

Para non deixar que a fatiga domine a vida diaria do paciente con cancro é necesario repoñer forzas físicas, cognitivas e emocionais a través da actividade e o exercicio físico, onde o máis difícil é comezar. A pesar do descanso, esta sensación de cansazo non desaparece. Todo o contrario, a falta de actividade e exercicio físico potencian esta percepción, creando un círculo vicioso entre a fatiga e a vida activa. Ao 30 por cento dos pacientes con cancro cústalles seguir coa súa vida diaria. A única forma de saír deste estado de fatiga continua é con movemento e exercicio constantes, aínda que o primeiro paso é "ter unha mente positiva", segundo engade Virginia.

Para non quedar parado ante a fatiga, recoméndaselles a estes pacientes manter as actividades aínda que o ritmo sexa menor, facer exercicio de forma regular e moderada, non culparse pola situación e pedir e aceptar a axuda dos demais. A pesar da fatiga e o decaemento, débese de ter unha actitude positiva. Os ensaios clínicos evidenciaron unha influencia positiva do exercicio físico fronte ao cansazo, "reducíndoo un 35 por cento e mellorando nun 30 por cento a vitalidade en pacientes con cancro", segundo datos achegados por Natacha Bolaños, especialista en rehabilitación oncolóxica de Grupo Español de Pacientes con Cancro (Gepac). Débese ser constante, xa que a fatiga persiste aínda meses despois de acabar o tratamento.

Fonte: www.larazon.es

Publicado en Novas

A práctica suave, durante uns minutos, de exercicio físico pode beneficiar os pacientes de cancro durante os tratamentos: reduce o nivel de estrés, de cansazo, os problemas de sono e outros síntomas.

Os efectos secundarios, tanto físicos coma psicolóxicos, derivados do diagnóstico de cancro e dos tratamentos oncolóxicos, poden facer que o paciente se sinta máis triste ou máis nervioso do normal, con debilidade muscular e máis cansado do habitual.

Na actualidade sábese que a actividade física de baixa intensidade como camiñar, facer Tai Chi, ioga ou dar paseos en bicicleta (terreo chan), melloran substancialmente a calidade de vida dos pacientes durante o tratamento.

Levar unha vida activa tras os tratamentos 
Aproximadamente un 60% das persoas diagnosticadas de cancro aumentan de peso debido á quimioterapia e aos tratamentos hormonais. Manter unha vida activa e unha alimentación saudable pode axudarlles a recuperar o peso ideal.

Ademais, na actualidade existen moitos estudos que demostran que a realización diaria de exercicio físico mellora a saúde e a calidade de vida das persoas tratadas por cancro, xa que permite reducir o cansazo, incrementar a forza muscular e ademais teñen efectos psicolóxicos positivos por que diminúe a ansiedade e a depresión.

É importante falar co oncólogo sobre a posibilidade de facer algunha actividade física. Non esquezas seguir os seus consellos.

Estas recomendacións poden axudar a incorporar progresivamente actividade física á vida cotiá dos pacientes de cancro:  
- As primeiras dúas ou tres semanas será suficiente con dedicar 15 minutos ao día para facer a actividade que máis guste. As seguintes tres semanas poderase incrementar 5 minutos ese tempo.
- Intenta non utilizar transporte (coche, autobús, tren...) para ir aos sitios máis próximos, o ideal é ir camiñando a paso lixeiro.
- Se é un lugar que está máis lonxe, párate na parada anterior ou aparca o coche antes de chegar ao teu destino e fai o resto do camiño a pé.
- Utiliza o menos posible o ascensor. Sobe e baixa escaleiras.
- Cando saias a camiñar, vai acompañado dun familiar ou dun/ha amigo/a.
- Se realmente non estás moi cansado, fai un pequeno esforzo. Anímate, móvete, vai por algún sitio que realmente che guste. Cando volvas á casa sentiraste mellor e máis animado.

Se nunca fixeches nada de exercicio e agora queres comezar a levar un estilo de vida máis saudable podes seguir estas recomendacións:
- O máis recomendable para empezar a ser activo é camiñar. Andar a ritmo rápido é o mellor deporte que pode facer unha persoa que parte dunha situación de sedentarismo. Tamén é unha boa actividade o ioga.
- As primeiras semanas dedica polo menos 30 minutos diarios a camiñar.
- Segundo vaias adquirindo forma física podes ir incorporando outro tipo de deporte ou exercicios. Para iso debes ter en conta que actividade che gusta máis e comezar gradualmente con ela.

Fonte: Asociación Española Contra o Cancro

Publicado en Novas

As enfermidades cardiovasculares constitúen, por diante do cancro e das patoloxías infecciosas, a primeira causa de mortalidade no mundo, incluída España. Aínda que en España presenta unhas taxas inferiores á media europea, estímase que ata un 68% da poboación española maior de 55 anos terá un infarto de miocardio ou infarto cerebral nos próximos 30 anos. Pero estas enfermidades, en gran medida, poden evitarse controlando os factores de risco modificables: o tabaquismo, o consumo excesivo de alcohol ou a obesidade.

Por iso, esta semana presentouse a aplicación "El Círculo de la Salud", unha iniciativa da Fundación Pro CNIC dirixida polo doutor Valentín Fuster, director do Centro Nacional de Investigacións Cardiovasculares (CNIC) e do Instituto Cardiovascular do Hospital Mount Sinai de Nueva York.

"El Círculo de la Salud" é unha iniciativa concebida para axudar a previr a enfermidade cardiovascular. Mediante unha interfaz de grande atractivo visual e un contido multimedia, o usuario pode descubrir os seis factores de risco modificables que dan lugar á enfermidade: colesterol, diabetes, obesidade, tensión arterial alta, consumo de tabaco e falta de exercicio físico. Esta “app” achega as claves sobre como previlos e coidar o corazón, ademais de ofrecer retos semanais cos que ter unha vida máis saludable. A súa descarga estará disponible de forma gratuíta para Android e iOS.

A aplicación ofrece tamén a posibilidade de realizar un cuestionario para que cada usuario poida coñecer o seu nivel de saúde cardiovascular, e ofrece diversos contidos multimedia que facilitan a experiencia do usuario.

Esta iniciativa, que utiliza as novas tecnoloxías como elemento de transmisión do coñecemento en saúde, é a última dun numeroso catálogo de actividades promovidas polo doutor Fuster para divulgar entre a poboación xeral, a adquisición de hábitos de vida máis saudables.

Está dividido en catro seccións:

- Información: salvo a idade e o sexo, pódense modificar todos os factores de risco para acadar unha boa saúde cardiovascular. A aplicación permite coñecer cales son, así coma as principais claves para previlos, grazas ás diferentes infografías e vídeos que presenta o doutor Fuster.

- Avaliación:
 se o usuario quere coñecer o seu nivel de saúde cardiovascular, pode responder a uns sinxelas preguntas e descubrir os factores que supoñen maior risco para el. A medida que vaia mellorando os seus hábitos, o usuario poderá repetir o cuestionario para analizar a súa evolución.

- Motivación:
 para adquirir bos hábitos é moi importante estar motivado. Aquí o usuario poderá coñecer os diferentes elementos que interveñen na súa motivación, tanto os relacionados coa maduración persoal coma os vinculados coa súa contorna social.

- Activación:
 a fase de motivación debe ir acompañada de accións específicas, polo que esta app propón diferentes retos semanais para que o usuario poida mellorar a súa saúde. Ademais, poderá compartir o progreso cos seus amigos ou familiares.

Aquí podes descarga a app para Android: Play Store 

Para iOS, disponible en App Store. 

Publicado en Novas

A conselleira de Sanidade, Rocío Mosquera Álvarez, presentou onte a Guía de axuda para programar os menús escolares no transcurso da I Xornada de Educación para a saúde na escola. Esta destacou que "o comedor escolar xoga un papel primordial xa que o 20% dos nenos realiza durante cinco días á semana a súa comida principal no centro de ensino, porcentaxe que aumenta ata o 32% no grupo de idade de 2-5 anos".

A guía recolle recomendacións xerais para elaborar o menú escolar; consellos, suxestións prácticas e ideas para cumprir coas recomendacións actuais das sociedades científicas; consellos de mellora de menús e propostas de solucións con exemplos prácticos; e fotografías como axuda para servir as racións axeitadas en función da idade de cada escolar. Esta publicación da Consellería de Sanidade pretende ser "un instrumento de apoio para os responsables do menú escolar" e ten como obxectivo "contribuír a mellorar a calidade nutricional dos menús escolares ofertados nos centros educativos".

A Consellería de Sanidade tamén ofrece actividade formativa presencial como complemento á guía, así búscase o intercambio de impresións, abordaxe de problemas in situ e posibles solucións; tamén a axudar a comprender as recomendacións indicadas; e desenvolver destrezas e habilidades á hora de elaborar as programacións. Como contido desta formación complementaria destaca os principios básicos da nutrición infantil, e explicacións das recomendacións establecidas na guía.

Ademais, durante a xornada fixéronse unha serie de recomendacións nutricionais na idade pediátrica; compartíronse experiencias exitosas na restauración colectiva na infancia e os modelos de intervención, como a iniciativa enfocada a integrar á familia no comedor escolar, para mellorar a oferta alimentaria no espazo escolar, ou o modelo de colaboración dende a administración pública mediante o acordo entre as Consellerías de Medio Rural e do Mar e Sanidade.

Tamén se abordou o coidado e calidade nutricional dende os servizos de catering e o programa Eu cociño, ti cociñas para aprender a comer ben a través da experiencia.

Plan Xermola
Esta iniciativa está enmarcada no Plan Xermola, unha actuación da Consellería de Sanidade dirixida a orientar á poboación infanto-xuvenil e ás súas familias cara a patróns de conduta saudables con fin de previr a obesidade infantil.Este plan pretende coñecer a prevalencia da obesidade na poboación escolar de 6 a 16 anos de Galicia, analizar o seu patrón alimentario e obter un protocolo de actuación en cada un dos ámbitos de intervención en base a ensaiar, avaliar e seleccionar as intervencións máis custo-eficaces no ámbito sanitario, educativo e comunitario.

O exceso de peso é hoxe o terceiro factor de risco para todas as causas de morte e discapacidade, despois do tabaco e a hipertensión arterial. Constitúe, ademais, un factor de risco para o desenvolvemento doutras enfermidades crónicas. De feito, o 44% dos casos mundiais de diabetes, o 23% de cardiopatía isquémica e entre o 7–41% de determinados cancros son atribuíbles ao sobrepeso e á obesidade, polo que hoxe en día, e dada a súa prevalencia, constitúe un problema de saúde pública de alcance mundial.

Ademais, a obesidade na infancia é o trastorno nutricional e metabólico máis frecuente e constitúe un dos problemas de saúde pública máis graves do século XXI, tanto polas súas consecuencias inmediatas na idade infantil coma polas súas repercusións futuras na idade adulta.

En Galicia, estímase que o 24,9 da poboación entre 6 e 15 anos ten sobrepeso e o 8,2% padece obesidade, é dicir, a terceira parte dos nosos nenos e adolescentes padecen sobrecarga ponderal. En España, a tendencia na prevalencia da obesidade e o sobrepeso infantil aumentou de forma continua nas tres últimas décadas, aínda que actualmente parece existir un certo grao de estabilidade. Neste ámbito, estímase que o gasto sanitario é duns 2.500 millóns de euros anuais entre custes directos e indirectos.

Publicado en Novas

Para seguir un estilo de vida máis saudable parece que é mellor facelo en parella. Así o suxire un estudo que se publica en Archives of Internal Medicine que asegura que as persoas teñen máis éxito na adopción de hábitos saudables se a súa parella lles acompaña. Por exemplo, din os investigadores do University College London (Gran Bretaña), que aqueles que deciden deixar de fumar ou facer máis exercicio físico lógrano máis facilmente se lles axuda a súa parella.

No seu traballo viron, entre as mulleres que fumaban, se a súa parella tamén o deixaba ao mesmo tempo, o 50% lográbao, mentres que se non tiñan ese reforzo porque a súa parella non fumaba, só o 17% o conseguía. Peores resultados obtiñan aquelas cuxo compañeiro era fumador habitual, menos do 8%. Similares resultados observábanse nos homes cando trataban de perder peso ou deixar de fumar.

A investigación analizou 3.722 parellas, casadas ou que vivían xuntas maiores de 50 anos, que participaban no Estudo Lonxitudinal Inglés sobre O Envellecemento (ELSA). Segundo Jane Wardle, directora do Centro de Investigación sobre Conduta Investigación do Cancro do Reino Unido na UCL e unha das autoras do estudo, "seguir un estilo de vida pouco saudable é a principal causa de morte por enfermidade crónica en todo o mundo". Os principais factores de risco son: tabaquismo, exceso de peso, sedentarismo, a mala alimentación e o consumo de alcohol. A boa nova, sinala, é "que sabemos que substituír os malos hábitos por bos pode reducir o risco de enfermidades, incluíndo o cancro".

Facer cambios no noso estilo de vida pode ter un gran impacto sobre a nosa saúde en xeral, e o risco de cancro en particular, e este estudo, sinala, amosa que "cando as parellas fan eses cambios xuntos teñen máis probabilidades de éxito". Por exemplo, se vostede quere perder peso e ten un amigo que está tratando de facer o mesmo poden planificarse para unirse a correr ou nadar na hora do almorzo ou despois do traballo.

Fonte: ABC.es

Publicado en Novas

As enfermidades non transmisibles son o cancro, a diabetes, as enfermidades cardíacas e pulmonares e os accidentes cerebrovasculares. Arredor de 16 millóns de persoas morren cada ano de forma prematura –antes de cumprir 70 anos– como consecuencia deste tipo de enfermidade. A causa na maioría dos casos é seguir hábitos pouco saudables. A Organización Mundial da Saúde (OMS) asegura que é necesaria unha acción urxente dos gobernos para cumprir os obxectivos globais e reducir a mortalidade das enfermidades non transmisibles (ENT).

"Con menos dun euro por persoa ao ano, os países poden reducir drasticamente a enfermidade e morte por ENT", asegura Margaret Chan, directora xeral da OMS. "A comunidade mundial ten a oportunidade de cambiar o curso da epidemia de enfermidades non transmisibles", engade. O obxectivo global da organización é reducir as mortes prematuras por esta causa nun 25% para 2025. O informe afirma ademais que a maioría das mortes prematuras das ENT poden previrse.

A OMS pide que se leven a cabo máis medidas para frear a epidemia, especialmente nos países con rendas medias e baixas onde as mortes por ENT están superando as das enfermidades infecciosas. "Case tres cuartas partes de todas as mortes por enfermidades non transmisibles –28 millóns– e o 82% das mortes prematuras prodúcense en países de ingresos baixos e medianos".

As accións recomendadas aos gobernos pola OMS inclúen:
- Prohibir a publicidade do tabaco e o alcohol
- Substituír as graxas trans por graxas poliinsaturadas
- Promover a lactación materna
- Previr o cancro de pescozo de útero mediante cribado
- Implementar programas de sensibilización pública sobre a dieta e a actividade física

Segundo a organización, moitos países xa tiveron éxito con estas intervencións para cumprir os obxectivos globais. "Turquía aumentou o tamaño das advertencias nas caixas de tabaco ata cubrir o 65% da superficie e os seus impostos subiron ata o 80% do prezo total. Ademais prohibiu totalmente a publicidade, promoción e patrocinio a nivel nacional deste produto. Como resultado, a taxa de tabaquismo descendeu nun 13,4%", asegura a OMS.

Pola súa parte, Hungría aprobou unha lei para gravar os compoñentes de alimentos e bebidas cun alto risco para a saúde, como o azucre, o sal e a cafeína e conseguiu un descenso medio de consumo dun 25-30%. Arxentina, Brasil, Chile, Canadá, México e os EEUU promoveron a redución de sal nos alimentos envasados e pan e Arxentina xa logrou unha redución do 25% no contido de sal no pan.

A OMS lamenta que a final do ano 2013 só 70 países tiveran en marcha algún plan nacional para reducir o risco de morte por ENT –a maioría deles, contra o tabaquismo–. A organización recorda que o risco de morte prematura afecta á saúde do país: "O custo dos tratamentos pode ser devastador para unha economía débil". A institución estima os gastos provocados polas ENT en países de rendas baixas e medias nuns 6.000 millóns de euros.

Fonte: 20 minutos

Publicado en Novas

Unha andaina de 20 minutos a pé cada día podería ser suficiente para reducir o risco de morte prematura. Afírmao un estudo que se publica en American Journal of Clinical Nutrition, no que se conclúe que o exercicio físico pode ser máis importante que a obesidade na prevención da enfermidade cardiovascular en particular, e da morte por calquera causa en xeral.

O estudo que analizou a máis de 334.000 persoas viu que o número de mortes atribuíbles á falta de actividade física dobraba ao de falecementos atribuíbles á obesidade: e, ademais, que un modesto aumento na actividade física podería ter beneficios significativos para a saúde.

O traballo deixa unha mensaxe clara: basta cunha pequena cantidade de actividade física diaria para que as persoas fisicamente inactivas obteñan importantes beneficios para a súa saúde. Segundo Ulf Ekelund, da Universidade de Cambridge (Reino Unido), "aínda que vimos que só 20 minutos marcan unha diferencia, deberíamos tratar de facer máis porque sabemos que a actividade física ten moitos máis beneficios para a saúde. Por iso, debe ser unha parte importante da nosa vida".

Sábese que a inactividade física se asocia cun maior risco de morte prematura, ademais de estar vinculada cun maior risco de patoloxías como as cardiovasculares ou o mesmo cancro. En canto á obesidade, pola súa parte, a pesar de que pode contribuír a un maior índice de masa corporal (IMC), tamén se sabe que a relación coa morte precoz é independente do índice de masa corporal dun individuo.

Os investigadores estiman que, a tenor dos datos máis recentes dispoñibles sobre mortes en Europa, 337.000 das 9,2 millóns de mortes ocorridas en Europa eran atribuíbles á obesidade (entendida coma un IMC superior a 30). Porén, o dobre (676.000) podería deberse á inactividade física.

Os investigadores, para medir a relación entre a inactividade física e a morte prematura e a súa interacción coa obesidade, analizaron os datos de 334.161 homes e mulleres de toda Europa que participaban no estudo EPIC. Durante unha media de 12 anos, os científicos valoraron unha serie de parámetros: altura, peso e a circunferencia da cintura e unha autoavaliación para medir os niveis de actividade física.

Os resultados amosaron que a maior redución no risco de morte prematura se produciu comparando entre os grupos inactivos e moderadamente inactivos, analizados por unha combinación da actividade no traballo con actividades lúdicas. Cerca dunha cuarta parte dos participantes (22,7%) foron clasificados coma inactivos.

Queimar calorías
Segundo estes resultados, os autores estiman que basta un paseo diario de 20 minutos para 'queimar' paseo entre 90 e 110 kcal, o que faría dunha persona inactiva a ser moderadamente inactiva e reducir así o seu risco de morte prematura entre un 16 e un 30%. Os mellores beneficiados foran as persoas cun peso normal, pero incluso aqueles cun maior IMC tiveron un beneficio.

Para outro dos autores, Nick Wareham, axudar á xente a perder peso pode ser un verdadeiro desafío e, ao mesmo tempo, "debemos ter como obxectivo reducir os niveis de obesidade na poboación, con intervencións de saúde pública que animen á xente a facer pequenos cambios, pero reais, na actividade física que poden ter beneficios significativos para a saúde e poden ser máis fáciles de lograr e manter".

Fonte: abc.es

Publicado en Novas

A Universidade de Granada realizou un estudo sobre os beneficios da actividade física para persoas maiores. As conclusións indican que os programas de exercicio dirixidos por especialistas supoñen a mellor terapia bio-psico-social, o que levaría a un aforro considerable para o sistema sanitario.

A investigación indica que o número de persoas maiores en España se incrementa e que foi altamente contrastado que o envellecemento activo é clave para conseguir unha poboación maior sa. Por tanto, a promoción de exercicio físico regular é unha das principais estratexias non farmacolóxicas coa que contan as institucións, xa que está asociado cun menor risco de mortalidade.

Principalmente, como consecuencia dun efecto protector cardiovascular e de síndrome metabólico, a actividade física diminúe o risco de sufrir un infarto de miocardio e de desenvolver diabetes tipo II. Sumado a isto, mostrouse a súa eficacia na prevención de certos tipos de cancro, no incremento da densidade mineral ósea, na redución do risco de caídas, na diminución da dor osteoarticular (frecuente na poboación maior) e na mellora da función cognitiva, reducindo o risco de padecer demencia e alzhéimer.

Ademais, os beneficios psicosociais do exercicio adquiren especial protagonismo, combatendo o illamento, a depresión e a ansiedade, favorecendo a autoestima e cohesión social. Por todo isto, a inclusión de programas de exercicio físico regular, adaptado á poboación maior e desenvolvidos por profesionais do ámbito das Ciencias da Actividade Física, convértese hoxe por hoxe nunha necesidade social.

O estudo pon de manifesto que a ausencia da práctica regular de exercicio contribúe ao comezo precoz e á progresión das principais enfermidades cardiovasculares. Calquera incremento nos niveis de actividade física ten efectos positivos sobre a saúde cardiovascular, ao mesmo tempo que un estilo de vida sedentario se asocia cun maior risco de enfermidades cardiovasculares.

A vida activa tamén supón unha terapia eficaz para aqueles maiores nos que a opción farmacolóxica resultou inviable, pouco efectiva ou inapropiada. Porén, os mecanismos polos que o exercicio fortalece o sistema inmune están aínda por descifrar. A día de hoxe, só partindo da evidencia, o incremento de programas de exercicio físico orientados á poboación xeriátrica reforzaría o seu sistema inmune con tendencia a anormalidades e con iso a esperanza e calidade de vida do maior.

Partindo destas evidencias, a práctica de exercicio físico regular a través da inclusión de programas enfocados e adaptados a persoas maiores, dirixidos ou supervisados por especialistas do ámbito da actividade física e apoiados por institucións públicas, preséntase coma a mellor terapia bio-psico-social.

Ditas prácticas físicas favorecerían un mellor estado de saúde e calidade de vida, conseguindo así manter e/ou favorecer a independencia funcional nun rango de poboación cun crecemento exponencial no noso país e unha maior esperanza de vida. Investir en exercicio físico de calidade para a poboación maior a través de profesionais cualificados en Ciencias da Actividade Física como precursores de saúde podería derivar nun aforro considerable para a sanidade, tanto pública coma privada.

Fonte: Munideporte.com

Publicado en Novas

A Sociedade Española de Oncoloxía Médica e a SEEDO celebrou o 26 de novembro o Día da Loita contra a Obesidade en España. Segundo datos achegados por estas dúas entidades, o sobrepeso produce o 15% das mortes en pacientes con cancro. Recordaron que no noso país o 22,9% dos adultos sofre obesidade.

Este ano celebrouse co lema "Previr a obesidade prevén o cancro". A efeméride coincide coa publicación dunha extensa revisión científica que vincula de forma directa dous problemas de saúde pública de elevadas proporciones: o sobrepeso e/ou obesidade e o cancro.

Os especialistas móstranse alarmados debido a que o sobrepeso está implicado no 15% das mortes por cancro. Sosteñen que o 30% delas se poderían evitar con hábitos de vida saudables e que o 4% dos homes e o 7% das mulleres deben a súa enfermidade á obesidade.

Os efectos da comorbilidade son manifestos e urxe poñer freo á epidemia do século XXI porque, segundo as sociedades científicas implicadas, nunha década a súa influencia será superior aos efectos do tabaco. 

A obesidade é unha enfermidade crónica e de tendencia epidémica no mundo occidental. En España, o 22,9% da poboación adulta é obesa seguindo ol indicador do índice de masa corporal (IMC), porcentaxe que aumenta ata o 36% se se utiliza o perímetro da cintura para definila. É dicir, un de cada tres españois é obeso.

Entre as principais enfermidades asociadas á obesidade están a diabetes mellitus tipo 2, a hipertensión arterial, a enfermidade cardiovascular e o cancro.  A doutora Purificación Martínez de Icaya, membro da SEEDO, explicou que "se ben a relación entre obesidade e cancro se mantivo solapada nos últimos anos pola importancia das enfermidades cardiovasculares como o infarto de miocardio ou o accidente cerebro-vascular, actualmente emerxe con forza polas súas importantes repercusións tanto sanitarias, como económicas e sociais".

Ademais, o exceso de peso no momento do diagnóstico relacionouse tamén cun peor prognóstico. Por exemplo, no cancro de mama diagnosticado antes da menopausa, as mulleres obesas presentan un incremento da mortalidade do 75% en comparación coas mulleres cun peso normal no momento do diagnóstico. E nos homes, a obesidade pode ser un factor de risco asociado a un tipo de cancro de próstata máis agresivo, e con maior probabilidade de ter unha enfermidade máis estendida no momento do diagnóstico. 

O doutor Pedro Pérez, coordinador do Grupo de Traballo SEOM de Prevención e Diagnóstico Precoz, apuntou que "os datos dispoñibles apuntan a que a obesidade é un factor de peor prognóstico tamén en outros tipos de neoplasias, e incluso que, cando unha persoa superou con éxito unha primeira enfermidade neoplásica, ao ser obesa, ten maior número de probabilidades non só de recidivar, senón tamén de desenvolver un segundo proceso neoformativo nunha localización distinta á primeira".

O presidente da SEEDO, o doutor Felipe Casanueva, resaltou a transcendencia médico-científica que ten vincular de maneira directa obesidade e cancro. Aludiu "á preocupación das sociedades científicas organizadoras deste evento por propoñer políticas públicas, programas integrais e documentos de consenso que aborden a prevalencia da obesidade  e o cancro así como a importancia da nutrición como prevención".

Sobre isto, a doutora Pilar Garrido, presidenta da Sociedade Española de Oncoloxía Médica, destacou a importancia da colaboración que se está desenvolvendo conxuntamente coa SEEN e coa SEEDO: "Os especialistas sabemos que cada vez vai haber máis persoas con cancro debido á nosa maior esperanza de vida e aos nosos hábitos de saúde; por iso un dos grandes retos que temos as sociedades científicas é contribuír a modificar hábitos de vida, incluíndo previr e evitar a obesidade, que tanta influencia teñen no cancro e que, non obstante, é pouco coñecido pola poboación. Por tanto a concienciación é fundamental". 

Os especialistas da SEEDO e SEOM consideran que aínda queda moito por investigar na relación entre dieta e cancro: "É un feito probado que determinados nutrientes funcionan de escudo protector contra numerosas enfermidades oncolóxicas e outros, porén, favorecen o seu desenvolvemento ou dificultan o seu tratamento".

Segundo explica Manuel Puig Domingo, presidente da Sociedade Española de Endocrinoloxía e Nutrición, "están aínda por descubrir cales son os mecanismos que interveñen no incremento do risco de cancro de persoas obesas". Apuntou que "un deles poderían ser fenómenos de tipo epixenético, isto é, modificacións de xenes importantes no desenvolvemento de cancro, que poderían conducir a unha maior actividade dos mesmos e a unha maior frecuencia de ditos cancros e/ou unha maior agresividade dos mesmos".

Fonte: Munideporte.com

Publicado en Novas
Sábado, 18 Outubro 2014 18:33

O exercicio físico e o cancro

O cancro de mama non se pode previr, porén estudos recentes parecen demostrar que o risco de padecer cancro de mama pode reducirse realizando exercicio físico de forma regular (polo menos 4 horas á semana), evitando o sobrepeso e a obesidade tras a menopausa e o consumo regular de alcohol.

O movemento implica un aumento das necesidades de enerxía, fundamentalmente a nivel muscular, pero tamén noutros órganos coma o sistema cardiovascular, sistema nervioso, respiratorio, metabólico e outros. Para responder a esta maior demanda de enerxía, póñense en marcha e actívanse a maior parte dos sistemas: o cardiovascular, para bombear e transportar máis sangue; o respiratorio, para tomar maior cantidade de osíxeno que logo o sangue transporte ata os músculos; o metabólico, para achegar os nutrientes (hidratos de carbono e/ou graxas) necesarios aos músculos; así coma o sistema nervioso e hormonal que se encargan de coordinar todos estes procesos.

Este estímulo sobre cada órgano e sistema ligado ao exercicio fai que a medio prazo se produzan adaptacións que melloran o seu funcionamento e capacidade. Durante o exercicio gástase enerxía e modifícase a función da maioría dos sistemas. Na recuperación restablécese o equilibrio e incluso chega a mellorar a súa función segundo se repite o adestramento. Todos coñecemos que en bioloxía hai un principio básico: "todo órgano ou sistema que non se estimula ou utiliza atrófiase", e neste sentido, o exercicio físico é un claro exemplo deste modo de comportamento.

A práctica regular de exercicio físico (entre 3 e 5 veces por semana) promove efectos beneficiosos para a saúde en xeral e tamén para as defensas inmunolóxicas fronte ao cancro.

- Efectos sobre a saúde en xeral.
- Reduce o risco relativo de mortalidade por calquera causa.
- Axuda a manter o peso ideal, reducindo o peso graxo e aumentando o muscular.
- Reduce os niveis de presión arterial.
- Mellora a función do sistema cardiovascular.
- Axuda a previr a osteoporose e a retrasar a artrose.
- Reduce a incidencia de molestias de costas.
- Axuda a previr a diabetes tipo 2.
- Mellora a autoestima.
- Reduce a incidencia de depresións.
- Combate os efectos do envellecemento.
- Efectos sobre saúde oncolóxica/inmunolóxica.

Os exercicios de intensidade aerobia (suave-moderada) son os que máis potencian a función do sistema inmunolóxico e con baixo impacto.

Fonte: AECC

Publicado en Novas
<< Inicio < Anterior 1 2 3 Seguinte > Final >>
Páxina 1 de 3