O programa de Exercicio Físico do Centro de Investigación Biomédica en Rede-Fisiopatoloxía da Obesidade e a Nutrición (CIBEROBN) obtivo novos e satisfactorios resultados grazas a camisetas biomédicas que permiten medir a actividade cardíaca e pulmonar en tempo real. O uso experimental en nenos destas prendas "intelixentes" en lugar dos tradicionais calorímetros supón un novo avance nos tratamentos antiobesidade e confirma as bondades do uso das TIC na medicina.

Exercicio á carta: máis seguro, mellor
A clave deste programa está no seu deseño individualizado para dar resposta ás necesidades e características de cada paciente, evitando que unha pauta xenérica sexa ineficaz e incluso chegue a ser contraproducente para a saúde dos nenos. "Non se trata só de desenvolver actividade física senón de facelo de acordo co que o noso corpo, por constitución, capacidade e resistencia física, pode soportar e necesita para manter un equilibrio", sostén a doutora Empar Lurbe, do Hospital Xeral Universitario de Valencia, coordinadora do estudo.

Esta pauta elabórase tendo en conta parámetros antropométricos e bioquímicos e, de maneira especial, a medición da función cardio-respiratoria dos máis pequenos. Ata a data, este control faise cos calorímetros (instrumentos destinados a medir a enerxía que gasta un individuo) que os pacientes deben portar durante un tempo determinado e cuxo incómodo manexo e falta de disciplina no seu uso deriva, en moitos casos, na ineficacia informativa en primeiro termo, e terapéutica, en última instancia. "Os nenos quítanos porque lles molesta", opina Empar Lurbe, "non facilita os datos necesarios e perdemos información esencial para poder prescribir a actividade física que contribúa realmente a unha maior adherencia ao tratamento e en definitiva a evitar a ganancia ponderal excesiva".

Estas novas prendas incorporan sensores no seu tecido que recollen continuamente parámetros cardíacos e respiratorios tanto en situación basal como durante a práctica de exercicio físico.  Estes parámetros son rexistrados por telemonitorización sen cables. A sinxeleza do seu funcionamento converte esta ferramenta en candidata idónea para un gran número de aplicacións fisiopatolóxicas e clínicas, non só no campo da obesidade senón noutros moitos ámbitos onde o exercicio físico é un elemento esencial.

Vestirse para adelgazar
A explicación á epidemia da obesidade infantil encontrámola en gran medida no elevado nivel de sedentarismo de nenos e adolescentes. España é o terceiro país europeo con máis obesidade infantil. Unha realidade que o CIBERobn pretende reverter deseñando programas e terapias que teñan como matriz a promoción de hábitos de vida saudable desde idades temperás, tales como cambios dietéticos baseados no patrón da dieta mediterránea, modificacións da conduta alimentaria e promover a actividade física. De aí nace o programa de Exercicio Físico para previr a obesidade infanto-xuvenil que dirixe a doutora e que colleitou xa grandes avances.

No seu empeño por combater a obesidade infantil e facelo respectando os códigos propios da contorna tecnolóxica actual, o CIBERobn centrouse en aplicar técnicas e ferramentas TIC a tratamentos médicos. "O binomio terapia-entretemento, composto por videoxogos, plataformas interactivas, Realidade Virtual ou Aumentada, é un claro exemplo desta liña de traballo que nos levou agora, de maneira multidisciplinar, a deseñar roupa 'intelixente'", conclúe a investigadora do Centro dependente do Instituto de Saúde Carlos III.

Cómodas e lixeiras camisetas que substitúen ao calorímetro e proporcionan aos especialistas os indicadores necesarios sobre gasto enerxético, resposta cardiovascular e respiratoria para saber que tipo de exercicio físico, cando, durante canto tempo e como debe prescribirse para obter resultados positivos.

Fonte: CIBEROBN

Publicado en Novas

O exercicio físico pode ter moitos efectos beneficiosos sobre a saúde; entre eles sábese que protexe fronte á depresión inducida polo estrés. Porén, ata agora ignorábanse os mecanismos que mediaban en dito efecto protector. Pero un estudo realizado no Instituto Karolinska(Suecia) parece ter dado coa resposta a esta cuestión. Os investigadores viron que o exercicio físico induce cambios no sistema músculo esquelético que poden purgar o sangue dunha substancia que se acumula durante o estrés e que se sabe que é prexudicial para o cerebro. O estudo publícase na revista Cell.

A pesar de que en termos neurobiolóxicos aínda non sabemos que é a depresión, sinala a investigadora Mia Lindskog, "o noso estudi representa unha peza máis no quebracabezas desta enfermidade, xa que ofrecemos unha explicación dos cambios bioquímicos protectores inducidos polo exercicio físico que impiden que o cerebro se dane durante o estrés". Non hai que esquecer que a depresión é un trastorno moi común en todo o mundo. A Organización Mundial da Saúde (OMS) estima que máis de 350 millóns de persoas viven coa enfermidade.

O estudo parte da base de que a proteína PGC-1α1 aumenta no músculo esquelético polla práctica de exercicio, e que dita proteína media no acondicionamento muscular beneficioso relacionado coa actividade física. Así, a partir dun rato modificado xeneticamente para que tivera niveis elevados de PGC-1α1 no músculo esquelético e doutro grupo de ratos control, os científicos expuxeron a ambos grupos a un ambiente estresante, como ruídos fortes, luces intermitentes, e alteraron o seu ritmo circadiano –sono/vixilia- en intervalos irregulares. Ás cinco semanas de estrés, os ratos control desenvolvera un comportamento depresivo, mentres que os modificados xeneticamente non presentaban síntomas depresivos.

Substancia beneficiosa
"Críamos que o músculo adestrado produciría unha substancia con efectos beneficiosos sobre o cerebro, pero en realidade vimos xusto o contrario", explica o director do traballo, Jorge Ruas. "O que facía o músculo ben adestrado é fabricar unha enzima que purga o corpo de substancias nocivas, algo similar á que fan outros órganos, coma o ril ou o fígado ao eliminar toxinas".

A continuación os investigadores descubriron que os ratos con maiores niveis de PGC-1α1 no músculo tamén tiñan cifras máis elevadas de enzimas KAT, que se encarga de converter unha substancia formada durante o estrés (quinurenina) en ácido quinurénico, un composto que non é capaz de traspasar a barreira hematoencefálica. E aínda que se descoñece a función exacta de quinurenina, os pacientes con depresión presentan alteracións de quinurenina.

Fonte: ABC.es

Publicado en Novas

A Facultade de Ciencias Empresariais e Turismo de Ourense da Universidade de Vigo abriu hoxe o prazo de matriculación para o Máster de Xestión Empresarial do Deporte, que se desenvolverá no vindeiro curso 2014/2015. O prazo para a matrícula iniciouse hoxe 29 de setembro e finaliza este mércores 1 de outubro.

Trátase do único Programa Oficial de Posgrao sobre esta temática en Galicia e un dos poucos en España. Está incluído no Top 20 do ránking mundial de Másters en Sport Management elaborado por Sport Business International.

As clases son os venres pola tarde (de 16 a 21h) e os sábados pola mañá (de 9 a 14h). A docencia é na Facultade de Ciencias Empresariais e Turismo do Campus de Ourense.

Os obxectivos xerais do título son:
1. Capacitar ao alumnado para a administración e dirección de todo tipo de entidade ou organización deportiva.
2. Favorecer o contacto directo co sector deportivo.
3. Ofrecer unha visión integradora dos distintos subsistemas que configuran o sistema organización/empresa no sector deportivo.
4. Coñecer e comprender a evolución do deporte desde o seu componente económico/empresarial.

Toda a información sobre o proceso de matrícula está en Proceso de matriculación.

A información sobre o master podes atopala en Información sobre o postgrao. O número de prazas de novo acceso que se ofrecen é de 25.

Para máis información: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .

Publicado en Novas

Dos distintos factores de risco cardiovascular entre os que se inclúen a obesidade, a hipertensión, a diabetes, o colesterol elevado, o tabaquismo, o consumo de alcohol e a inactividade física, este último é o responsable dun 5% das enfermidades cardiovasculares, segundo un informe da World Heart Federation (WHF).

Precisamente, e co obxectivo de promover a práctica de exercicio diario, a Fundación Española do Corazón (FEC) organizou o sábado a V Carreira Popular do Corazón, enmarcada na conmemoración do Día Mundial do Corazón, o 29 de setembro, e cuxos beneficios se destinarán ás campañas de concienciación e educación sanitaria da poboación, así como á investigación das enfermidades cardiovasculares.

E é que, segundo a Enquisa Nacional de Saúde, no noso país o 35,86% dos homes e o 46,64% das mulleres son sedentarios.

Son coñecidos xa os moitos beneficios de practicar actividade física de forma regular. Agora, investigadores do Karolinska Institute realizaro un estudo no que se observou que, en mulleres de mediana e avanzada idade, andar ou camiñar pequenos períodos de tempo cada día se asocia cun menor risco de padecer fibrilación auricular, a arritmia máis frecuente que afecta ao 4,4% dos españois maiores de 40 anos (máis de 1.018.000 persoas).

Segundo Leandro Plaza, presidente da FEC, "é esencial realizar deporte a diario e adaptar o noso corpo á práctica habitual de exercicio para aumentar a súa capacidade. A miúdo, parece que a actividade deportiva só se poida facer de maneira especializada e a unha hora en concreto nun ximnasio pero non é así. O importante é adquirir hábitos de vida como ir andando ao traballo ou subir andando as escaleiras, por exemplo. De feito, camiñar é o exercicio máis fácil e un hábito que se pode repetir cada día".

A FEC recorda que as enfermidades cardiovasculares seguen sendo a primeira causa de morte no noso país. Tres de cada dez persoas morren por enfermidades do corazón, segundo os datos publicados en febreiro deste 2014 polo Instituto Nacional de Estatística (INE), o que supón o 30,30% dos falecementos anuais. Neste informe indícase que 122.097 persoas morreron durante o 2012 a causa dalgunha enfermidade do corazón.

O exercicio despois do infarto
O exercicio é fundamental na rehabilitación dos pacientes con calquera tipo de cardiopatía, incluso os que sufriron infartos. O primeiro paso é consultar ao médico, que determinará o nivel de esforzo, por medio dunha ergometría ou proba de esforzo. O especialista deseñará o programa de rehabilitación cardíaca que inclúa apoio psicolóxico.

O máis beneficioso é o chamado aerobio: camiñar, correr, pedalear en bicicleta e nadar. Neste tipo de actividades mobilízanse moitos músculos. Mentres que o exercicio estático ou anaerobio (coma o levantamento de pesas) ten menos efectos positivos para o corazón e pode resultar perigoso se non se fai de forma controlada.

Beneficios da práctica deportiva:
- Controla a tensión arterial, os niveis de colesterol e de glicosa.
- Axuda a baixar e controlar o peso.
- Diminúe a formación de coágulos sanguíneos e aumenta a capacidade para disolvelos.
- Mellora a forma física e a tolerancia ao exercicio.
- Axuda a que o corazón funcione mellor: reduce o número de latidos por minuto, mellora a súa contracción e desenvolve novas arterias.
- Reduce as arritmias.
- Evita a ansiedade, a depresión e o estrés.
- Mellora a calidade de vida, reduce as recaídas e a mortalidade.

Que precaucións tomar
- Nunca se debe iniciar a actividade física sen ter consultado a un especialista sobre os exercicios máis adecuados e a que intensidade practicalos.
- Non comece un deporte sen ter un adestramento físico previo.
- A actividade debe facerse de forma progresiva. Evite esforzarse demasiado. Non obterá ningún beneficio e pode chegar a ser perigoso.
- De nada serve exercitarse se non se ten unha dieta saudable, unha adecuada medicación e se controla o peso.
- Tras o primeiro mes, o médico podería autorizar correr, practicar natación e bicicleta estática, sempre coa frecuencia cardíaca baixo vixilancia.

Fonte: Fundación Española do Corazón

Publicado en Novas

Un estudo elaborado polo Hospital Xeral de Massachusetts (EEUU) indica que ter irmáns con sobrepeso é un factor clave para padecer obesidade, máis que se a teñen os pais. As probabilidades varían en función do número de nenos que residan no fogar, así coma do seu sexo. O exercicio é indispensable para previlo.

Este traballo, publicado na revista American Journal of Preventive Medicine, foi levado a cabo por investigadores do Hospital Xeral de Massachusetts, a Universidade de Cornell e a Universidade de Duke. Os datos obtidos parecen contradicir as teorías que aseguran que os nenos con pais obesos teñen unha maior probabilidade de selo tamén. Tras entrevistar a máis de 10.244 adultos, os expertos encontraron que a probabilidade de obesidade infantil variaba en función do número de nenos que vivían no fogar, así como do seu sexo.

Segundo o estudo, nun fogar onde só haxa un neno, a probabilidade de que este sexa obeso é 2,2 veces maior se un dos pais tamén o é. Porén, en familias con dous fillos, os datos mostraron unha relación máis forte da obesidade entre irmáns. Así, os nenos maiores nestes fogares, nos que ademais había un pai obeso, eran 2,3 veces máis propensos a ter sobrepeso, pero esta cifra sobe ata 5,4 cando hai irmáns con sobrepeso. Se o neno é o menor nunha familia de dous irmáns, a obesidade dos pais non é relevante, pero cando hai un irmán maior, a obesidade está asociada cun incremento de ata 5,6 veces.

Mark C. Pachucki, membro do Hospital Xeral de Massachusetts, indicou que "o ambiente familiar exerce unha forte influencia sobre a saúde infantil. Porén, a maioría das investigacións centráronse na conexión entre a obesidade paterna e a súa descendencia ou entre irmáns. Pero neste traballo, foise máis lonxe ao relacionar todos os factores familiares. Así, vimos que a obesidade dos irmáns parece ser máis importante que a dos pais". Comenta, ademais, que dita relación é "independente dunha serie de factores socioeconómicos e demográficos, condutas de saúde e o estado xeral de saúde familiar".

Os datos tamén revelaron unha relación entre o xénero e o risco de obesidade. Nos fogares cun único fillo, as nenas eran menos propensas a ser obesas que os rapaces. O mesmo ocorreu tamén en familias con dous descendentes.

Os investigadores conclúen que os nenos máis pequenos poden ser particularmente susceptibles á influencia dun irmán maior, sobre todo se é do mesmo sexo: "Vimos que o risco de obesidade nos nenos máis novos das familias con dous fillos é 11,4 veces maior se teñen un irmán maior; pero, se o maior é unha nena, a probabilidade de ser obeso é só de 6,6 veces. E, se hai dúas nenas na familia, o risco és de 8,6 veces, mentres que se o irmán maior é un rapaz e o menor é un nena, entón non inflúe na probabilidade de ter sobrepeso".

O traballo recoñece tamén que o exercicio físico e a dieta desempeñan un papel clave na prevención da obesidade. 

Mentres que os autores fan fincapé en que se necesita máis investigación sobre a obesidade na contorna familiar, este novo estudo ofrece datos clave que serán beneficiosos na loita contra a obesidade infantil. Pachucki concluíu que "debido a que é un estudo transversal, non podemos afirmar que sexan estes irmáns os que están causando a obesidade. A pesar diso, os nosos resultados son consistentes con investigacións que mostran que os irmáns tenden a comer por igual e teñen niveis similares de actividade física". Considerou que esta información pode ser importante á hora de deseñar campañas de prevención da obesidade.

Fonte: Munideporte.com

Publicado en Novas

A práctica de actividade física e manter unha alimentación equilibrada serán as claves das novas guías alimentarias de 2015. Así o sinalou Javier Aranceta, presidente do Comité Científico da Sociedade Española de Nutrición Comunitaria. No ano 2012 a inxestión media de enerxía en España foi de 2.609 quilocalorías por persoa e día. 

Expertos reunidos en Laguardia (Álava) debateron sobre as actuais guías e enquisas alimentarias, que permitan desenvolver unhas recomendacións nutricionais e dietéticas, así como de actividade física, máis acordes coa poboación e estilos de vida actuais. Este encontro foi organizado pola Sociedade Española de Nutrición Comunitaria (SENC), en colaboración coa Fundación para a Investigación Nutricional (FIN) e a Fundación Española da Nutrición (FEN). O seu obxectivo era debater e investigar sobre o papel da actividade física e o equilibrio enerxético na prevención de problemas de saúde como o sobrepeso e a obesidade, dentro dos novos modelos de enquisas alimentarias e de exercicio físico.

O presidente do Comité Científico da SENC, Javier Aranceta, sinalou que "manter unha alimentación variada e equilibrada, xunto á práctica de actividade física gratificante, serán a claves das novas guías alimentarias do 2015. De feito, a actividade física e o balance enerxético cobrarán máis importancia nas novas guías de alimentación e tamén nos estudos da poboación".

Durante a reunión, presentáronse e debatéronse aspectos e controversias derivadas da metodoloxía utilizada na avaliación do consumo de alimentos e da actividade física para calcular o balance enerxético. Tamén a necesidade de realizar axustes nas formulacións das actuais enquisas de investigación e cálculo de valores para a dieta. Neste sentido, a investigación sobre balance enerxético considerouse como un dos aspectos clave no presente e futuro da nutrición, de acordo a dous documentos de consenso publicados recentemente a nivel internacional en revistas de elevado impacto científico.

Aranceta sostivo que "debemos traducir a nivel poboacional os obxectivos nutricionais con maior evidencia científica. A nosa finalidade é que esas recomendacións cheguen ao prato nunha contorna na que perdemos en ocasións o instinto sobre a cantidade e variedade de alimentos que debemos comer".

Para Lluis Serra-Majem, catedrático de Medicina Preventiva e Saúde Pública da Universidade de Las Palmas, "o estilo de vida mediterráneo, considerado en todos os seus aspectos (alimentación, actividade física, socialización) como un óptimo modelo comportamental para o estilo de vida, considérase o mellor sistema na prevención, e probablemente tamén no tratamento do sobrepeso e a obesidade e o excesivo sedentarismo".

Abordáronse tamén aspectos como a estimación da inxestión enerxética en relación á actividade física, e profundou en conceptos como o equilibrio enerxético e a súa importancia na prevención do sobrepeso e a obesidade. Isto adquire se cabe máis relevancia se se teñen en conta os datos sobre os patróns alimentarios en España durante os últimos 40 anos, nos que se observa como, a diferenza do que puiera esperarse segundo as actuais cifras de sobrepeso e obesidade, o total de calorías inxeridas hoxe polos españois é un 13% menor que décadas atrás. En concreto, a inxestión media de enerxía pasou de 3.008 kcal/persoa/día en 1964 ás 2.609 kcal/persoa/día en 2012.

Gregorio Varela-Moreiras, catedrático de Nutrición e Bromatoloxía da Universidade San Pablo CEU de Madrid e membro do Comité de Expertos do Plan Galicia Saudable, explicou que "a pesar de ter reducido a inxestión de calorías na nosa dieta, non somos capaces de ter un balance enerxético equilibrado, xa que debido ao noso estilo de vida inactivo, o gasto de enerxía é moi inferior ao desexable".

Ademais, o profesor Varela-Moreiras e outros participantes, comentaron un novo modelo de metodoloxía para o estudo denominado ANIBES. Así, durante o ano 2015, presentaranse con evidencia científica os primeiros datos obtidos dunha enquisa nacional multidisciplinar e representativa que incluíu datos antropométricos (IMC, perímetro abdominal e porcentaxe de materia graxa), inxestión de enerxía e macronutrientes e gasto de enerxía a partir dunha enquisa de actividade física, validada cun 9,1% de acelerómetros nunha parte da mostra analizada, e aspectos relacionados coa saúde.

Isto é aínda máis importante tendo en conta que o estudo se realizou para catro cohortes (para poder analizar modelos comportamentais), de nenos de nove a 12 anos, adolescentes de 13 a 17 anos, adultos de 18 a 64 anos e persoas maiores de 65 a 75 anos, cun dato medio global para a poboación total de nove a 75 anos.

Fonte: Munideporte.com

Publicado en Novas
Xoves, 25 Setembro 2014 15:20

Galicia Saudable únese á Semana MOVE

O Plan Galicia Saudable promove a semana MOVE, un evento anual con repercusión en toda Europa que forma parte da campaña NowWeMOVE para fomentar a práctica de actividade física entre a poboación. Este ano a Semana MOVE levarase a cabo entre o 29 de setembro e o 5 de outubro.

O obxectivo da Semana MOVE é promover os beneficios de ser activo e practicar regularmente deporte e actividade física. Unha ampla gama de promotores da actividade física (chamados Axentes de MOVE) coordinan eventos, incluíndo actividades físicas existentes e nuevas, para a Semana MOVE.

No seguinte link tedes a información do programa: http://spain.moveweek.eu/. Desde Galicia Saudable convidámosvos a darvos de alta como AXENTES MOVE do programa e subir os vosos propios eventos para a Semana MOVE. Podedes incorporar calquera evento ou actividade que promova a práctica da actividade física e do deporte que se desenvolva nesa semana (29 de setembro a 5 de outubro).

- Para darse de alta aquí como AXENTE MOVE.

- Unha vez dado de alta, podes SUBIR UN EVENTO.

- Neste outro link tedes os logos para as vosas webs.

A semana MOVE e a campaña NowWeMOVE están sendo coordinados centralmente pola Asociación Internacional de Deporte e Cultura (ISCA), en colaboración coa Federación Europea de Ciclistas (ECF).

A que esperades para subir os vosos eventos? 

Publicado en Novas

Levar un estilo de vida saudable, incluíndo o mantemento dun peso e unha dieta saudables, practicar exercicio, non fumar e moderar o consumo de alcohol, podería previr catro de cada cinco eventos coronarios en homes, segundo un novo estudo cuxas conclusións se publican no Journal of the American College of Cardiology.

Aínda que a mortalidade por enfermidades do corazón diminuíu nas últimas décadas, con gran parte da redución atribuíble ás terapias médicas, os autores deste traballo sinalan que a prevención mediante un estilo de vida saudable evita posibles efectos secundarios da medicación e é máis rendible para reducir a enfermidade coronaria en toda a poboación.

Para o estudo, os investigadores examinaron unha poboación de 20.721 hombs suecos sans de 45 a 79 anos de idade e seguíronos durante 11 anos. Avaliaron os seus modos de vida mediante unha enquisa sobre a dieta, o consumo de alcohol, o tabaquismo, o nivel de actividade física e a adiposidade abdominal (graxa abdominal).

Os homes no estudo co risco máis baixo eran non fumadores, camiñaban ou montaban en bicicleta durante polo menos 40 minutos ao día, facían exercicio polo menos unha hora á semana, tiñan unha circunferencia de cintura por debaixo de 95 centímetros, tomaban cantidades moderadas de alcohol e seguían unha dieta saudable cun consumo regular de froitas, verduras, legumes, froitos secos, produtos lácteos baixos en graxa, grans integrais e peixe.

Os investigadores encontraron unha clara redución no risco de ataque cardíaco para cada factor de estilo de vida individual que practicaban os participantes na análise. Por exemplo, ter unha dieta cun consumo moderado de alcohol provocou un risco estimado de ataque cardíaco un 35% inferior que o grupo de alto risco, é dicir, aqueles que non seguen ningún factor saudable de baixo risco.

Os homes que combinan a dieta de baixo risco e o consumo moderado de alcohol con non fumar, ser fisicamente activos e ter unha baixa cantidade de graxa abdominal, presentaron un 86% menos de risco. Os investigadores encontraron resultados similares nos homes con niveis de hipertensión e colesterol alto.

"Non é sorprendente que as opcións de estilo de vida saudables poidan conducir a unha redución nos ataques ao corazón", afirma a autora principal do estudio, Agneta Akesson, profesora asociada no Instituto de Medicina Ambiental do Instituto Karolinska, en Estocolmo. "O que é sorprendente é como se reduciu drasticamente o risco debido a estes factores", engade.

Segundo estes expertos, a carga de enfermidade cardiovascular podería reducirse significativamente a través de programas dirixidos aos homes e que promoven un estilo de vida de baixo risco. Incluso naqueles que toman medicación, observouse unha redución adicional no risco de enfermidade cardíaca crónica cando levan un estilo de vida saudable.

"É importante sinalar que estas condutas de estilo de vida son modificables e cambiar as condutas de alto risco polas de baixo risco pode ter un grande impacto na saúde cardiovascular", afirma Akesson. "Porén, o mellor que un pode facer é adoptar estilos de vida saudables desde a infancia", aconsella.

Fonte: Europa Press 

Publicado en Novas

A Clínica Mayo (Estados Unidos) publicou dez técnicas para incorporar a actividade física á vida diaria e a xornada laboral de forma sinxela. O obxectivo é eliminar o exceso de sedentarismo entre os seus pacientes para lograr previr enfermidades non transmisibles como a hipertensión, a obesidade ou as afeccións cardiovasculares.

Os facultativos expoñen que se, a pesar de facer o posible por buscar tempo para a actividade física, este obxectivo se converte nunha meta de difícil alcance ¿por que non facer exercicio mentres se está traballando?

As técnicas que se expoñen son:
- Comezar co desprazamento ao traballo: camiñar ou ir en bicicleta. Se se viaxa en autobús ou metro, baixarse unhas paradas antes e facer camiñando o resto do traxecto. Se se conduce ata a oficina, aparcar máis lonxe. No edificio utilizar as escaleiras en lugar do ascensor.

- Levantarse e traballar: estar de pé supón maior gasto calórico que estar sentado. Buscar formas de levantarse da cadeira, falar por teléfono mentres se camiña, deixar o correo electrónico ou as mensaxes instantáneas e desprazarse para comentar cos compañeiros os asuntos laborais.

- Facer exercicio nos descansos: en vez de quedar falando mentres se toma un café, realizar unha andaina a paso rápido ou algúns estiramentos suaves. 

- Levar un balón de exercicio ao traballo: pensar cambiar a cadeira de escritorio por un balón de estabilidade ou exercicio, inflado con firmeza sempre que se poida encontrar o equilibrio con seguridade sobre o balón. O equilibrio mellorará e tonificaranse os músculos centrais mentres se está sentado fronte ao escritorio. Utilizar o balón de exercicio para sentarse en "cuclillas" apoiado na parede ou para realizar outros exercicios durante o día.

- Gardar material de exercicio no traballo: almacenar cintas de resistencia, cordas para facer estiramentos ou tubos que ofrecen resistencia similar ás pesas cando se tira delas, ou pequenas pesas de mano nos caixóns do escritorio ou as taquillas. Pódese practicar exercicio cos brazos entre reunións ou tarefas.

- Unir forzas: organizar un grupo para camiñar na hora da comida e desfrutar cos compañeiros que tamén queiran facer algo máis de exercicio. Pódense encontrar apoios entre os compañeiros para realizar exercicio regular e animarse cando os ánimos decaian.

- Reunións en movemento: cando sexa práctico, fixar reunións que se poidan realizan durante un paseo. Pódense levar a cabo dentro do edificio se o tempo non acompaña a saír ao exterior.

- Aumentar o ritmo: se o traballo implica camiñar, facelo máis rápido. Canto máis se camiñe e con maior velocidade se faga, maiores serán os beneficios.

- Se se viaxa por traballo, planificalo por adiantado: se se está esperando nun aeroporto, poden collerse as maletas e dar unha rápida andaina. Elixir un hotel que teña un espazo para facer exercicio, como cintas para camiñar, máquinas de pesas ou unha piscina, ou levar consigo o equipamento. Unha comba e unhas cintas de resistencia son fáciles de incluír na equipaxe de man. Por suposto, pódense practicar exercicios anaerobios ou abdominais.

- Probar un escritorio con cinta andadora integrada: se se está listo para pasar a un nivel máis avanzado, poderíase expoñer este método que supón camiñar mentres se traballa. Se se pode colocar de forma confortable e segura a superficie de traballo sobre unha cinta andadora, cunha pantalla de ordenador nunha superficie fixa, un teclado sobre a mesa ou un escritorio vertical poderíase realizar actividade física mentres se desempeña o traballo.

Os investigadores da Clínica Mayo estiman que os empregados de oficina con sobrepeso que substitúen o tempo de ordenador sentados, por tempo no ordenador camiñando entre dúas a tres horas ao día poderían perder entre 20 e 30 quilogramos nun ano. "O ritmo non ten que ser necesariamente lixeiro, nin andar ata suar. Porén, canto máis rápido se camiñe máis calorías se gastarán", conclúen. 

Fonte: Munideporte.com 

Publicado en Novas

Os galegos maiores de 50 anos son os españois que máis importancia conceden a ter un bo estado de saúde, segundo recolle unha enquisa realizada por Nielsen e Sanofi Pasteur MSD.

Así, os galegos son os españois que mostran maior preocupación por perder a súa autonomía (83%), mobilidade (75%), memoria (75%) e padecer enfermidades que lles provoquen dor (73%).

En concreto, a esperanza de vida en Galicia sitúase sobre os 82 anos de vida, de forma que é la terceira comunidade cunha poboación máis envellecida, xa que as persoas maiores de 65 anos representan máis do 20% do censo galego, por detrás de Castela-León e Asturias, segundo datos do Instituto Nacional de Estatística.

Ao respecto, o xefe do servizo do Hospital Lucus Augusti e profesor asociado de Medicina Preventiva da Universidade de Santiago de Compostela, Carlos Quintas, avoga por adquirir bos hábitos como mellor forma de conservar a saúde, como a adecuada alimentación, realizar exercicio ou un uso adecuado de medicamentos.

Nova ampliada: www.spmsd.es

Publicado en Novas
<< Inicio < Anterior 1 2 3 4 5 6 7 8 9 10 Seguinte > Final >>
Páxina 1 de 19