"Promoción da Actividade Física e Deportiva entre os escolares de Galicia no ámbito do Plan Galicia Saudable". Este é o título da conferencia inaugural do IV Congreso Mundial do Deporte Escolar. Seminario Internacional de Educación Física, Escolas Deportivas e Psicomotricidade, que se celebrará os días 5, 6 e 7 de novembro na Facultade de Ciencias da Educación da Coruña. José Ramón Lete Lasa, secretario xeral para o Deporte, será o encargado de expoñer a importancia da práctica de actividade física en idade escolar.

Este encontro intentará reunir a preto de 400 profesionais da iniciación deportiva, co obxectivo de crear estratexias que favorezan a práctica deportiva, melloren a calidade desta e eviten o abandono deportivo.

O congreso está aberto a estudantes, deportistas, técnicos deportivos, docentes, investigadores, psicomotricistas, e calquera persoa que se sinta atraída por estes ámbitos.  

Ademais da conferencia de José Ramón Lete Lasa, o programa componse de numerosas mesas redondas e obradoiros con especialistas dos ámbitos deportivo e escolar. O programa completo do congreso pode consultarse nesta páxina web.

Por outro lado, o prazo de presentación de traballos finaliza o próximo 5 de outubro. Haberá premios económicos para a mellor comunicación, póster e póster virtual. Todos os traballos serán incorporados a un CD de actas coa súa correspondente ISBN e D.L. A organización seleccionará entre 5-10 traballos para a súa proposta de publicación na Revista técnico-científica RETOS.

O evento está organizado polo Departamento de Didácticas Específicas da Universidade da Coruña e Sportis Formación Deportiva, en colaboración coa Facultade de Ciencias da Educación, a Secretaría Xeral para o Deporte da Xunta de Galicia e o Concello da Coruña, e conta co patrocinio da Deputación da Coruña.  

Máis información e inscricións en www.sportis.es

Publicado en Novas
Xoves, 18 Setembro 2014 21:32

Masterclass de Zumba na Coruña

O maior evento de zumba en Galicia chega á Coruña este sábado 20 de setembro. Desde as 19.00 e ata as 21.00 horas o Polideportivo Monte das Moas (A Coruña) contará con algúns dos mellores instructores deste baile ou disciplina de fitness. 

Os interesados en participar no evento poden conseguir máis información no teléfono 655 640 543. 
Publicado en Novas

A Asociación Española de Pediatría (AEP) recorda que o inicio do curso escolar e a volta á rutina é un momento idóneo para incorporar hábitos saudables na vida dos nenos, "que lles axuden a crecer sans". E é que a etapa escolar "é unha das máis importantes do desenvolvemento infantil, xa que tanto as súas habilidades intelectuais como sociais e físicas están en pleno crecemento", remarcan os pediatras, que realizan aos padres as seguintes recomendacións:

- Unha hora de exercicio ao día, como mínimo. O coordinador do grupo de traballo de Actividade Física da AEP, Gerardo Rodríguez, destaca que "unha actividade física adecuada relaciónase cun mellor rendemento escolar e cun mellor estado anímico dos nenos". Ademais, prevén o sobrepeso e as enfermidades cardiometabólicas no futuro. Por iso recomenda "un mínimo dunha hora diaria de actividade física moderada-intensa". As actividades extraescolares deportivas -especialmente ao aire libre-, os paseos en familia e reducir as horas de consumo de televisión e fronte ao ordenador son formas de aumentar o exercicio físico dunha maneira divertida.

- Entre nove e once horas diarias de sono. A AEP insiste en que os nenos en idade escolar deben durmir entre 9 e 11 horas, como mínimo. "Está demostrado que unha correcta hixiene do sono favorece a aprendizaxe, a asimilación de experiencias e o crecemento", subliñan. Por esta razón "hai que acostumar os nenos á rutina do sono escolar o antes posible", indica o doutor Rodríguez. Para que a adaptación sexa progresiva, recoméndase que un par de semanas antes de volver ao cole se acostume os niños a deitarse cedo e seguir os horarios escolares.

- Alimentación: imprescindible almorzar. Tras os hábitos alimenticios máis relaxados do verán, é importante volver a controlar de cerca a rutina alimentaria dos nenos, recordan os pediatras. En primeiro lugar, o almorzo é parte clave da alimentación do neno e debe cubrir o 25% das necesidades calóricas diarias. Para que sexa completo debe incluír lácteos, cereais e froita. Ademais, se o neno come no colexio, débese revisar o menú do comedor escolar para planificar, tamén, a alimentación de casa. "Hai que ser proactivos na alimentación dos nosos fillos e saber que comen no colexio para ofrecerlles unha alimentación equilibrada", aconsella o doutor Rodríguez. Tamén recomenda deixar de lado os bolos industriais e "aproveitar a media mañá ou a hora da merenda para incluír froita na dieta en forma de pezas enteiras, non de zume".

- Mochila. Os pediatras insisten en que a mochila escolar, que acompañará aos nenos durante todo o curso, non debe ser elixida ao azar. "Son recomendables as que teñen correas anchas e acolchadas, e hai que recordar que o seu peso non debe superar nunca o 10 ou o 15% do peso corporal do pequeno", sinalan. Rodríguez engade que "hai que evitar que o neno cargue con peso innecesario". Os carriños son unha boa opción, ao igual que axudar o neno a cargar coa mochila se esta é demasiado pesada.

A presidenta da sección de Psicoloxía Educativa do Colexio Oficial de Psicólogos de Galicia, Manuela del Palacio, aconsella aos pais "prestar moita atención aos nenos e intentar que falen da súa experiencia na aula durante os primeiros días de clase". "A comunicación é, sempre, fundamental", recalca Del Palacio. "É imprescindible que fomenten o interese dos seus fillos por contarlles cousas e que confíen neles", insiste esta especialista, quen aproveita o inminente inicio do curso escolar para recomendar, tamén, aos proxenitores, "que non sobrecarguen" os pequenos "con actividades extraescolares" que poidan "afectar ao seu rendemento escolar".

Fonte: La Opinión de A Coruña

Publicado en Novas

Ir en bici ou camiñando ao traballo mellora a saúde mental. Esta é a conclusión da última investigación realizada por economistas da saúde na Universidade de East Anglia, Norwich, Norfolk, Inglaterra, e o Centro de Dieta e de Investigación da Actividade (Reino Unido) e que recolle a revista Preventive Medicine.

Para a súa investigación, os expertos realizaron un seguimento dos datos de 18.000 pasaxeiros con idades comprendidas entre os 18 e os 65 anos durante un período de 18 anos. Neles destacábanse varios aspectos relacionados coa saúde mental como a tristeza, o insomnio, os problemas, os ingresos ou cambios nas relacións sociais.

Segundo se desprende do estudo, as persoas que deixaron de conducir e empezaron a ir andando ou en bicicleta ao seu traballo rexistraron un mellor benestar así coma unha mellor capacidade de concentración e un menor nivel de estrés. "O noso estudo mostra que canto máis tempo se pasa durante os desprazamentos en coche, peor é o benestar psicolóxico e, en consecuencia, a xente síntese mellor cando ten un longo paseo ata o traballo", comenta Adam Martin, líder do estudo.

Entre as bondades de camiñar ou ir en bici xa se encontran os saudables beneficios físicos pero, grazas a este traballo, a faceta de saúde mental converteuse noutro punto positivo de facer exercicio a nivel moderado. Ademais, os participantes que decidiron cambiar o vehículo propio por un de transporte público, sentiron unha melloría no seu benestar psicolóxico ao igual que os que decidiron camiñar ou ir en bicicleta ao traballo.

"Un achado sorprendente foi que os pasaxeiros dixeron sentirse mellor cando viaxaban en transporte público, en comparación con conducir. Poderíase pensar que cousas coma a interrupción do servizo ou multitudes de pasaxeiros poderían causar estrés pero como autobuses ou trens tamén dan ás persoas tempo para relaxarse, ler e socializar e, polo xeral, hai un paseo ata a parada de autobús ou a estación de tren, todo iso parece animar á xente", afirma Martin.

Fonte: Muy Interesante

Publicado en Novas

O estilo de vida actual xera desequilibrios psicolóxicos relacionados co estrés, a ansiedade ou a concentración. A solución a estes problemas pode chegar desde unha práctica deportiva regular e controlada, xa que proporciona un equilibrio mental que inflúe na percepción dun benestar xeneralizado.

A práctica deportiva supón unha mellora da condición física proporcional á cantidade e calidade do exercicio que realizamos. Porén, directamente unido ao estado físico de cada persoa está o seu equilibrio mental, cuxos beneficios xerados pola actividade deportiva "non se ven, non se tocan", como sinala o psicólogo do deporte Pablo del Río.

A maior visibilidade dos resultados físicos mediante unha melloría muscular, provoca que o deporte se relacione coas persoas novas. Así a todo, os resultados psicolóxicos fan do exercicio unha actividade necesaria en calquera idade.

Practicar exercicio físico, unha nova actitude mental
Levantarse do sofá e comezar a facer exercicio permite poñer fin a unha práctica sedentaria que pode dexenerar en enfermidades coronarias ou neurovasculares. Ese primeiro paso supón para o novo deportista "un cambio no estilo de vida importante, un cambio mental", segundo afirma o doutor Miguel del Valle Soto, catedrático da Universidade de Oviedo e delegado do reitor para o Deporte e a Saúde.

Aínda que se está estudando a repercusión do exercicio físico sobre a saúde mental, o deporte actúa sobre o sistema nervios o central, estabilizando determinadas proteínas e evitando a aparición de enfermidades producidas pola ruptura "do equilibrio destas substancias", afirma Miguel del Valle.

Dentro das proteínas endóxenas xeradas polo exercicio físico, Pablo del Río destaca as endorfinas como neurotransmisores "que son capaces de xerar unha sensación de relaxación e felicidade".

Por tanto, a mellora do equilibrio mental a partir da actividade física non é unha sensación subxectiva senón un proceso fisiolóxico obxectivo.

Beneficios da práctica deportiva
Desfrutar das vantaxes físicas e psicolóxicas do deporte depende de como comeza a súa práctica. Pablo del Río recomenda antes de iniciar a actividade deportiva facer “un recoñecemento médico e unha valoración funcional”, o que permitirá realizar unha prescrición do exercicio, é dicir, adecuar o deporte ao peso, idade e características de cada persoa.

Non seguir estes consellos pode xerar lesións físicas que afectan ao noso estado psicolóxico mediante a dor e a redución de mobilidade, impedindo desfrutar de beneficios psíquicos do deporte, tales como:
- Aumento da autoestima.
- Aumenta a autoconfianza.
- Mellora a memoria.
- Maior estabilidade emocional.
- Mellor funcionamento intelectual.
- Maior independencia.

Segundo a opinión do catedrático Miguel del Valle, estes beneficios converten o exercicio físico nunha actividade que debería ser prescrita en patoloxías coma a ansiedade, a depresión ou os trastornos do sono.

A importancia do deporte na saúde mental relaciónase coa prevención e o tratamento dos desequilibrios psicolóxicos.

A práctica deportiva prevén patoloxías físicas debido á activación do sistema inmunolóxico e enfermidades dexenerativas coma o alzhéimer, xa que inflúe nunha mellor concentración. No tratamento de enfermidades, o deporte permite equilibrar as substancias cuxo desaxuste xerou a enfermidade, actuando de forma similar a un fármaco.

Fronte a estes beneficios, tanto o catedrático Miguel del Valle coma o psicólogo do deporte Pablo del Río coinciden en que os principais riscos da actividade deportiva son unha mala realización que leve a xerar lesións físicas ou a súa conversión nunha obsesión, podendo converterse nunha patoloxía coma a vigorexia.

Fonte: Axencia Efe

Publicado en Novas

Realizar actividade física durante dous minutos cada media hora ten efectos beneficiosos na saúde e o metabolismo. Así conclúe un estudo da Universidade de Otago sobre o sedentarismo prolongado e as súas consecuencias. Os investigadores afirman que se melloran os niveis de glicemia nos adultos.

O principal obxectivo deste traballo, publicado na revista científica American Journal of Clinical Nutrition, foi comparar os efectos sobre a glicemia, insulinemia e lipidemia postprandiais de tres comportamentos diferentes: un comportamento sedentario prolongado de nove horas; a realización de actividade física durante trinta minutos, seguido dun comportamento sedentario; e pausas regulares de actividade física dun minuto e 40 segundos de duración cada media hora de comportamento sedentario.

As conclusións mostran que interromper as condutas sedentarias prolongadas mediante algo menos de dous minutos de actividade física cada media hora "ten un efecto positivo na saúde", e en concreto sobre a glicemia e insulinemia postprandial en adultos sans. Por outro lado, o traballo revela que as persoas que acumulan tempo sedentario mediante períodos máis longos e ininterrompidos presentan un "peor perfil de factor de risco cardiovascular e metabólico" que aqueles cuxo total de tempo sedentario é o mesmo, pero interrómpeno regularmente con períodos de actividade física lixeira.

O estudo anima á comunidade médica a prescribir a interrupción con regularidade dos períodos sedentarios mediante breves períodos de actividade física. Ademais, propón que "as recomendacións de saúde pública suxiran romper os períodos de estar sentados cada 30 minutos como modelo complementario a unha práctica de actividade física regular".

A Organización Mundial da Saúde (OMS) recomenda a nenos e mozos de entre cinco a 17 anos, que realicen polo menos 60 minutos de actividade física de moderada a vigorosa a diario. Aconsella que se leve a cabo mediante xogos, partidos, desprazamentos, deporte, exercicio planificado e educación física a desenvolver nun contexto fundamentalmente familiar e escolar.

Para adultos de entre 18 e 64 anos, os consellos da OMS inclúen a realización de actividade física durante o tempo libre, desprazamentos físicos, actividade ocupacional derivada do labor profesional, quefaceres domésticos, xogos e partidos, deporte, etc. A estas idades, o organismo internacional recomenda realizar polo menos 150 minutos de actividade física aerobia de moderada a vigorosa á semana ou polo menos 75 minutos de actividade aerobia intensa e vigorosa á semana.

Fonte: Munideporte.com

Publicado en Novas

Con motivo das festas patronais da Barquiña, a celebrar do 12 ao 16 de setembro, a Fundación Ricardo Pérez y Verdes e o MELGA (Museo Etnolúdico de Galicia) de Ponteceso, conxuntamente coa Comisión de Festas de Ponteceso, desenvolverá un programa de actividades lúdico-festiva.

Unha ruta de bicicletas clásicas terá lugar o domingo 14 a partir das 11.00 horas, percorrendo Melga, Tella, Ponteceso, Malecón, O Couto e Ponteceso. É obrigatorio levar unha bicicleta clásica anterior a 1970 e roupa de época. A actividade é gratuíta e os interesados poden inscribirse ata o 11 de setembro no MELGA ou no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .

Xa pola tarde, tamén o domingo, celebrarase a I Baixada de Carretas e Carros. A saída farase ás 18.00 horas desde o Alto da Trabe. Os interesados en participar poden incribirse de forma gratuíta ou solicitar máis información no MELGA, no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo ou nos teléfonos 981 715 442 ou 661 290 246. A data límite é o xoves 11 de setembro.

O martes 16 de setembro está programado un Circuíto de Karts. Será a partir das 18.00 horas no Paseo fluvial do río Anllóns. Os interesados poden acadar máis información no MELGA, no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo . A data límite para inscribirse é o xoves 11 de setembro.

Por outro lado, haberá unha exposición de bicicletas clásicas desde o 13 ao 16 de setembro no Museo Etnolúdico de Galicia de 11.00 a 13.00 e de 17.00 a 20.00 horas.

Publicado en Novas

Distintos estudos xa suxeriran que o consumo moderado de viño protexe o corazón. Agora, unha nova investigación, presentada no Congreso da Sociedade Europea de Cardioloxía polo profesor Milos Taborsky da República Checa, asegura que só ten un efecto beneficioso se nos mantemos fisicamente activos.

"É a primeira investigación a nivel global que compara os efectos do viño branco e tinto en marcadores de arterioesclerose en persoas con leve ou moderado risco de enfermidade cardiovascular", explicou o profesor Taborsky.

O estudo contou con 146 participantes que tiñan un risco entre leve e moderado de enfermidade cardiovascular. A cada un asignóuselles de forma aleatoria o consumo moderado dun tipo de viño durante un ano: branco ou tinto, da mesma colleita e a mesma rexión da República Checa. O resto da súa dieta non cambiou.

A OMS considera un consumo moderado 200 ml para as mulleres e 300 mililitros para os homes, cun máximo de cinco tomas á semana.

O criterio de valoración principal foi o nivel de colesterol bo (HDL) nun ano. Os secundarios foron os niveis doutros marcadores de arterioesclerose, incluíndo o colesterol malo (LDL).

Os investigadores encontraron que non había diferenzas entre os niveis de colesterol bo dos participantes un ano despois do comezo do estudo en ningún dos dous grupos. O colesterol malo si se reduciu en ambos casos, mentres que o colesterol total foi máis baixo só no grupo que bebeu viño tinto.

"Un incremento do colesterol bo é o principal indicador do efecto protector fronte á enfermidade cardiovascular, polo que podemos concluír que ningún dos dous tipos de viño tivo impacto nos participantes", sinalou o profesor Taborsky.

O único resultado positivo e continuo encontrouse no subgrupo de pacientes que practicou máis exercicio, polo menos dúas veces por semana, ademais de tomar o viño branco ou tinto. Neste grupo, o colesterol bo incrementouse e o malo e o total diminuíu.

"Nun estudo futuro compararemos os efectos do viño tinto e branco en marcadores de arterioesclerose de pacientes con alto de risco de enfermidade cardiovascular que toman estatinas e fan exercicio regular. Esperamos encontrar que o consumo moderado de viño é seguro para estes pacientes", concluíu o profesor.

Fonte: ABC.es

Publicado en Novas

O ciclismo, entendido como deporte e saúde, sen facer mención ao ciclismo profesional, é un deporte aerobio que ao practicalo de forma moderada pon en marcha o consumo de graxa. A utilización desta graxa corporal como combustible muscular asegura poder contar cunha dispoñibilidade moito máis extensa de combustible, así a fatiga muscular preséntase moito máis tarde na práctica do ciclismo que noutros deportes e esta mobilización dos depósitos de graxa provoca unha serie de cambios no perfil lipídico beneficiosos para a saúde.

Beneficios de montar en bicicleta
O sedentarismo supón un factor de risco para o desenvolvemento de numerosas enfermidades crónicas, polo tanto introducir o deporte de forma xeral, e o ciclismo en particular, produce numerosos beneficios, tanto físicos como psicolóxicos para a saúde. Desde Runrun.es sinalan os seguintes:

1- Diminúe o risco de mortalidade por enfermidades cardiovasculares en xeral.
2- Prevén e/ou retrasa o desenvolvemento de hipertensión arterial, e diminúe os valores de tensión arterial en hipertensos.
3- Reduce os triglicéridos e aumenta o colesterol HDL (ou colesterol "bo").
4- Mellora a regulación da glicemia e diminúe o risco de padecer diabetes non insulino dependente.
5- Mellora a dixestión e a regularidade do ritmo intestinal.
6- Diminúe o risco de padecer certos tipos de cancro, como o de colon.
7- Incrementa a utilización da graxa corporal e mellora o control do peso.
8- Axuda a manter e mellorar a forza e a resistencia muscular, incrementando a capacidade funcional para realizar outras actividades físicas da vida diaria.
9- Axuda a manter a estrutura e función das articulacións.
10- Axuda a conciliar e mellorar a calidade do sono.
11- Mellora a imaxe persoal e permite compartir unha actividade coa familia e amigos.
12- Axuda a liberar tensións e mellora o manexo do estrés.
13- Axuda a combater e mellorar os síntomas da ansiedade e a depresión, e aumenta o entusiasmo e o optimismo.
14- Axuda a controlar e mellorar a sintomatoloxía e o prognóstico en numerosas enfermidades crónicas (cardiopatía isquémica, hipertensión arterial, enfermidade pulmonar obstrutiva crónica, obesidade, diabetes, osteoporose, etc).

Bicicleta e traballo
Por outro lado, un estudo recente afirma que o uso da bicicleta para ir a traballar reduce o absentismo un 25%. Segundo o doutor Alberto Sacristán Rubio, experto universitario en actividade física e saúde, "o exercicio físico é primordial para a saúde xa que a inactividade ten un impacto negativo sobre un total de 20 enfermidades crónicas, responsables do 60 % das mortes".

"Utilizar a bicicleta para ir ao traballo pode supor un bo comezo, alcanzable e sen compromiso, para as persoas que non adoitan a practicar deporte. Esa sinxela práctica influiría positivamente en moitos aspectos da vida das persoas e melloraría o seu estado de saúde xeral", segundo o doutor.

Publicado en Novas

Moitos estudos científicos confirmaron que o exercicio é bo para a saúde, pero canto é necesario para ter beneficios? Nun estudo publicado esta semana, un grupo de investigadores suecos, despois de analizar a case 40.000 persoas de entre 20 e 90 anos, concluíron que máis dunha hora de exercicio moderado ou media hora de exercicio intenso ao día pode reducir o risco de fallo cardíaco nun 46%. O traballo, que agora se publica na revista Circulation, comezou en 1997 e incluía a persoas que entón non sufrían fallo cardíaco. O equipo sueco de científicos observou que canto máis activa era unha persoa, menor era o seu risco de padecelo.

Este estudo tamén confirmou que, aínda que unha maior cantidade de exercicio proporciona maiores beneficios, incluso uns niveis baixos de actividade poden ter efectos positivos. Ademais de promover o exercicio como parte dunha vida sa, os autores do artigo, investigadores da Universidade de Uppsala, consideran que deseñar cidades nas que camiñar ou moverse en bicicleta sexa fácil e seguro pode proporcionar grandes beneficios para a saúde.

A explicación para os beneficios da actividade física prodúcense, entre outras cousas, porque durante o exercicio o músculo se contrae con maior frecuencia e potencia, incrementando o fluxo sanguíneo ás arterias. Isto provoca cambios sutís no sistema autónomo que controla a contracción e a relaxación dos vasos sanguíneos e acaba por reducir o número de pulsacións en repouso, fai baixar a tensión e contribúe a ter un corazón capaz de latir nun rango máis amplo. Todos estes factores reducen o risco de sufrir enfermidades cardiovasculares. Ademais, o exercicio relacionouse cunha redución da inflamación, que adoita estar implicada en doenzas como a arteriosclerose.

O exercicio adelgaza pouco
Pese a que o vínculo entre exercicio e saúde non esperte demasiadas dúbidas, non ocorre o mesmo co que existe entre o deporte e o adelgazamento, unha motivación que, con frecuencia, impulsa máis á xente a moverse que o estado das súas arterias. No caso do exercicio moderado, se se considera que camiñar un quilómetro consume unhas 70 calorías e se percorren cinco quilómetros ao día, iso suporía un consumo extra dunhas 350 calorías diarias. Aínda que a cantidade é importante, un quilo de graxa contén unhas 7000 calorías, co que mantendo a dieta habitual o proceso de perda de peso sería moi lento e podería producir desmotivación. Por agora, parece que o principal método para perder peso e manterse nun saudable é reducir o número de calorías consumidas.

En calquera caso, como amosou o estudo sueco confirmando outros traballos anteriores, incluso unha pequena cantidade de exercicio que non nos converta en sílfides pode axudarnos a estar mellor. Un estudo liderado por Chi Pang Wen, dos Institutos Nacionais de Investigación en Saúde de Taiwan, analizou os niveis de actividade física de 400.000 taiwaneses durante oito anos. Neste grupo, descubriron que incluso as persoas que facían tan só 15 minutos de exercicio ao día tiñan un 14% menos de posibilidades de morrer neses oito anos posteriores e incrementaban a súa vida en tres anos de media respecto ás persoas inactivas.

O artigo mencionaba tamén que, ademais de reducir o risco de enfermidades do corazón, o cuarto de hora de exercicio podía ter evitado unha de cada nove mortes por cancro rexistradas entre os que non realizaron ningún tipo de actividade física. Por último, trataron de observar se o que acontecía era que as persoas máis activas tiñan, en xeral, un estilo de vida máis saudable. E non foi así. Cando se separaron factores como beber alcohol ou fumar, observouse que os beneficios do deporte para a saúde seguían presentes.

Fonte: esmateria.com

Publicado en Novas
<< Inicio < Anterior 1 2 3 4 5 6 7 8 9 10 Seguinte > Final >>
Páxina 1 de 18