A conselleira de Sanidade, Rocío Mosquera Álvarez, presentou onte a Guía de axuda para programar os menús escolares no transcurso da I Xornada de Educación para a saúde na escola. Esta destacou que "o comedor escolar xoga un papel primordial xa que o 20% dos nenos realiza durante cinco días á semana a súa comida principal no centro de ensino, porcentaxe que aumenta ata o 32% no grupo de idade de 2-5 anos".

A guía recolle recomendacións xerais para elaborar o menú escolar; consellos, suxestións prácticas e ideas para cumprir coas recomendacións actuais das sociedades científicas; consellos de mellora de menús e propostas de solucións con exemplos prácticos; e fotografías como axuda para servir as racións axeitadas en función da idade de cada escolar. Esta publicación da Consellería de Sanidade pretende ser "un instrumento de apoio para os responsables do menú escolar" e ten como obxectivo "contribuír a mellorar a calidade nutricional dos menús escolares ofertados nos centros educativos".

A Consellería de Sanidade tamén ofrece actividade formativa presencial como complemento á guía, así búscase o intercambio de impresións, abordaxe de problemas in situ e posibles solucións; tamén a axudar a comprender as recomendacións indicadas; e desenvolver destrezas e habilidades á hora de elaborar as programacións. Como contido desta formación complementaria destaca os principios básicos da nutrición infantil, e explicacións das recomendacións establecidas na guía.

Ademais, durante a xornada fixéronse unha serie de recomendacións nutricionais na idade pediátrica; compartíronse experiencias exitosas na restauración colectiva na infancia e os modelos de intervención, como a iniciativa enfocada a integrar á familia no comedor escolar, para mellorar a oferta alimentaria no espazo escolar, ou o modelo de colaboración dende a administración pública mediante o acordo entre as Consellerías de Medio Rural e do Mar e Sanidade.

Tamén se abordou o coidado e calidade nutricional dende os servizos de catering e o programa Eu cociño, ti cociñas para aprender a comer ben a través da experiencia.

Plan Xermola
Esta iniciativa está enmarcada no Plan Xermola, unha actuación da Consellería de Sanidade dirixida a orientar á poboación infanto-xuvenil e ás súas familias cara a patróns de conduta saudables con fin de previr a obesidade infantil.Este plan pretende coñecer a prevalencia da obesidade na poboación escolar de 6 a 16 anos de Galicia, analizar o seu patrón alimentario e obter un protocolo de actuación en cada un dos ámbitos de intervención en base a ensaiar, avaliar e seleccionar as intervencións máis custo-eficaces no ámbito sanitario, educativo e comunitario.

O exceso de peso é hoxe o terceiro factor de risco para todas as causas de morte e discapacidade, despois do tabaco e a hipertensión arterial. Constitúe, ademais, un factor de risco para o desenvolvemento doutras enfermidades crónicas. De feito, o 44% dos casos mundiais de diabetes, o 23% de cardiopatía isquémica e entre o 7–41% de determinados cancros son atribuíbles ao sobrepeso e á obesidade, polo que hoxe en día, e dada a súa prevalencia, constitúe un problema de saúde pública de alcance mundial.

Ademais, a obesidade na infancia é o trastorno nutricional e metabólico máis frecuente e constitúe un dos problemas de saúde pública máis graves do século XXI, tanto polas súas consecuencias inmediatas na idade infantil coma polas súas repercusións futuras na idade adulta.

En Galicia, estímase que o 24,9 da poboación entre 6 e 15 anos ten sobrepeso e o 8,2% padece obesidade, é dicir, a terceira parte dos nosos nenos e adolescentes padecen sobrecarga ponderal. En España, a tendencia na prevalencia da obesidade e o sobrepeso infantil aumentou de forma continua nas tres últimas décadas, aínda que actualmente parece existir un certo grao de estabilidade. Neste ámbito, estímase que o gasto sanitario é duns 2.500 millóns de euros anuais entre custes directos e indirectos.

Publicado en Novas

Os nenos que ven máis de dúas horas ao día a televisión son máis propensos ao sobrepeso, realizan menos actividade física e poderían ter un maior risco de dificultades de atención e aprendizaxe durante os seus anos de adolescencia e o inicio da súa vida adulta, segundo diferentes estudos publicados no último ano.

E o certo é que a cantidade de tempo que os nenos pasan ao día usando pantallas, coma as de televisores e ordenadores, excede as pautas recomendadas polos expertos, segundo conclúe un estudo publicado na revista BMC Public Health. Estas directrices elaboráronse nun momento no que as tabletas, os teléfonos móbiles e outros dispositivos móbiles non estaban tan presentes na vida cotiá, o que suxire que deben reescribirse.

O uso prolongado das pantallas por parte dos nenos está asociado con resultados de saúde físicos e mentais adversos, como un maior risco de depresión e ansiedade nas adolescentes. Aínda que no presente estudo non se ven directamente os efectos sobre a saúde dos nenos, este traballo parte dunha investigación lonxitudinal que o fará.

En 2001, a Academia Americana de Pediatría publicou recomendacións sobre que os nenos menores de 2 anos non deben estar expostos ás pantallas e débese limitar a exposición nos maiores de 2 anos a menos de dúas horas ao día. Estas directrices e a maioría das análises de seguimento baseáronse en preguntar aos nenos sobre o seu consumo de televisión e videoxogos sen preguntar sobre outros tipos de medios de pantalla.

Para facer fronte a isto, investigadores da Universidade de Australia Occidental entrevistaron a 2.620 nenos de entre 8 e 16 anos de 25 escolas primarias e secundarias en Australia. Mostróuselles aos escolares diferentes tipos de pantalla: iPad, iPod Touch, ordenador portátil, PlayStation Portable (PSP), ordenador portátil e Xbox, e exemplos dos diferentes tipos de actividades que se poden facer con estas pantallas: ver a televisión, o uso de mensaxes instantáneas, xogar a xogos de ordenador e facer os deberes.

Logo, preguntóuselles sobre a cantidade de horas que utilizan estes dispositivos, desde que espertan ata que van á cama, incluíndo antes, durante e despois da escola. Encontraron que unha media do 63 por cento dos enquisados superou as directrices recomendadas de menos de dúas horas.

O máis popular entre todos os participantes foi a televisión, cun 90% que a viu durante a última semana, seguida polo ordenador portátil (59%), iPad/tableta (58%) e teléfono móbil (57%). Houbo variación no uso dentro dos grupos individuais de idade: o 45 por cento dos participantes máis novos (a partir de 8 anos), superou as directrices, e o 80 por cento das persoas de 14 a 15 anos.

Fonte: Europa Press

Publicado en Novas

Os españois vense moi gordos ou moi delgados, non hai termo medio. Un 52% encontra que está lonxe do seu peso ideal por exceso ou por defecto, o que os converte nun caso único por chamativo en Europa, segundo o informe "Saúde e Benestar" elaborado pola consultora Nielsen. É canto menos curioso comprobar como os españois se sitúan nos extremos da báscula, ese temido elemento que agarda no cuarto de baño ou no dormitorio e co que o resto de europeos mantén unha relación de máis equilibrio.

Desta forma, o 25% dos españois considera que ten moito sobrepeso, multiplicando por cinco a media de europeos que se perciben moi por enriba do que sería o seu peso ideal. Ningún dos compatriotas europeos ten peor valoración do seu peso e, de feito, a media no continente é de apenas o 5%. En particular, resulta moi chamativo que os veciños europeos máis próximos apenas se vexan con quilos de máis. Só entre o 1 e o 3% dos franceses, italianos e portugueses pensan que teñen un problema serio coa báscula.

No entanto, os españois mostramos predisposición a coidarnos máis a través da alimentación e, á hora de comprar alimentación e bebidas no establecemento habitual, atributos como a escaseza ou ausencia de graxas, colesterol, calorías ou sal inflúen á hora de decidirse a comprar un produto en vez doutro. Sete de cada dez españois dan unha grande importancia a estes beneficios saudables no momento da compra.

A pesar desta predisposición manifestada por sete de cada dez españois, non son tantos os partidarios de facer un esforzo económico para adquirir produtos con propiedades saudables. En concreto, en torno á metade dos consumidores está disposto a pagar máis, polo que para arredor de dúas de cada dez persoas a compra destas referencias non debe implicar un incremento do ticket no momento de pasar por caixa.

A pesar de que unha cuarta parte dos españois considera que ten moitos quilos de máis, hai tamén unha parte importante da poboación, ata o 27%, que considera que o seu peso está por debaixo do ideal, algo que só o 8% de europeos se atreve a afirmar. Os españois son os que se ven máis delgados de todo o continente e, por tanto, os que máis poñen en práctica fronte ao lineal esa predisposición a elixir un produto con atributos saudables fronte a outro sen eles.

A percepción de peso que teñen os españois e os europeos no seu conxunto pode ser aínda máis diferente. Tal como constata o informe "Saúde e Benestar", a media de persoas en España que considera que está no seu peso ideal sitúase no 28%, once puntos por debaixo da media europea. Son os europeos que máis lonxe se ven do peso ideal. Por citar algúns exemplos, o 46% dos franceses pensa que non ten un gramo de máis ou de menos, a mesma consideración que ten o 33% de británicos.

Fonte: Nielsen

Publicado en Novas

O esquí é un deporte de montaña que consiste no deslizamento pola neve, por medio de dúas táboas suxeitas á sola das botas do esquiador mediante fixacións mecánicas. Hoxe celébrase o Día Mundial da Neve, e con tal motivo recollemos algunhas recomendacións da Fundación Española do Corazón para a práctica desta modalidade deportiva.

O esquí, sobre todo na especialidade de "fondo", produce grandes beneficios cardiovasculares, xa que require unha demanda enerxética de tipo aerobio con predominio de contraccións musculares de tipo dinámico. Realizado de forma continua, produce adaptacións morfolóxicas e funcionais sobre o corazón e o sistema circulatorio (tamaño do corazón, a frecuencia cardíaca, o gasto cardíaco, o fluxo sanguíneo, a tensión arterial e o volumen sanguíneo), que axudan a previr, tratar e rehabilitar moitas enfermidades cardiovasculares.

Prepárate para esquiar
Realiza exercicios básicos de elasticidade e flexibilidade das distintas musculaturas (cadeira, cintura, xeonllo, ombro, pulso e cóbado), co fin de acondicionar estas articulacións para o exercicio e conseguir unha boa mobilidade.

O habitual é empregar máis dunha hora por sesión, pero sempre dependerá da condición física de quen o practique. O importante é comezar a esquiar sempre de forma moi suave e sen forzar nas primeiras baixadas.

Consellos
- É conveniente realizarse un recoñecemento médico-deportivo, antes de empezar a práctica deportiva, para descartar patoloxías ou posibles contraindicacións que desaconsellen a realización deste deporte.

- Comeza a práctica con cursos de iniciación con monitores acreditados, ben en grupo ou de forma individual, para adquirir unhas boas bases técnicas.

- Coida o calzado. As botas no esquí alpino son ríxidas, polo que convén afacerse a elas probándoas en "terra", antes de subir a esquiar por primeira vez. As persoas con problemas podolóxicos poden ter dificultades para practicar o esquí de fondo (outras modalidades levan botas máis "brandas").

- Os esquís non deben ser moi longos, xa que canto máis longos, máis velocidade se toma. Ata adquirir destreza na execución técnica, non se deben alcanzar velocidades altas. Os esquís máis curtos son máis fáciles de manexar.

- Os bastóns deben adquirirse en función da altura.

- Utiliza roupa de abrigo impermeable e ropa interior térmica, así coma gorro, bufanda e luvas axeitados para a súa práctica.

- É imprescindible levar gafas de sol con protección UVA para evitar posible queimaduras de córnea.

- Utiliza sempre protección solar para a pel e os beizos.

- Contrata un seguro de montaña, que en moitas instalacións pode ir incluído no forfait. Se se sobe frecuentemente é interesante federarse en esquí ou montaña.

- Hidrátate antes, durante e despois da súa práctica.

- Se non queres parar a comer, leva polo menos no peto alimentos que te axuden a repor enerxías: froitos secos, galletas, chocolates, barriñas enerxéticas.

- Leva unha dieta cardiosaudable e evita as comidas copiosas.

Precaucións
- O esquí é un deporte con alto índice de accidentes, polo que se debe practicar con moita precaución e control, para evitar lesións a un mesmo ou aos demais.

- A interrupción temporal deste tipo de exercicio produce unha rápida regresión das adaptacións cardiovasculares alcanzadas, polo que unha vez finalizada a temporada de esquí é aconsellable a práctica doutros deportes de características similares como a natación, ciclismo, sendeirismo ou montañismo, entre outros.

- Non esquíes en solitario, nin fóra das pistas ou en tramos pechados.

- Evita o esgotamento e descansa. Aproveita as pausas para estirar e relaxar a musculatura.

O esquí e o control dos factores de risco
- Evita o exceso de peso e prevén a obesidade.
- Mellora a tensión arterial.
- Controla o colesterol e os triglicéridos.
- A contorna natural na que se realiza pode axudar a combater o estrés.

Publicado en Novas

Unha andaina de 20 minutos a pé cada día podería ser suficiente para reducir o risco de morte prematura. Afírmao un estudo que se publica en American Journal of Clinical Nutrition, no que se conclúe que o exercicio físico pode ser máis importante que a obesidade na prevención da enfermidade cardiovascular en particular, e da morte por calquera causa en xeral.

O estudo que analizou a máis de 334.000 persoas viu que o número de mortes atribuíbles á falta de actividade física dobraba ao de falecementos atribuíbles á obesidade: e, ademais, que un modesto aumento na actividade física podería ter beneficios significativos para a saúde.

O traballo deixa unha mensaxe clara: basta cunha pequena cantidade de actividade física diaria para que as persoas fisicamente inactivas obteñan importantes beneficios para a súa saúde. Segundo Ulf Ekelund, da Universidade de Cambridge (Reino Unido), "aínda que vimos que só 20 minutos marcan unha diferencia, deberíamos tratar de facer máis porque sabemos que a actividade física ten moitos máis beneficios para a saúde. Por iso, debe ser unha parte importante da nosa vida".

Sábese que a inactividade física se asocia cun maior risco de morte prematura, ademais de estar vinculada cun maior risco de patoloxías como as cardiovasculares ou o mesmo cancro. En canto á obesidade, pola súa parte, a pesar de que pode contribuír a un maior índice de masa corporal (IMC), tamén se sabe que a relación coa morte precoz é independente do índice de masa corporal dun individuo.

Os investigadores estiman que, a tenor dos datos máis recentes dispoñibles sobre mortes en Europa, 337.000 das 9,2 millóns de mortes ocorridas en Europa eran atribuíbles á obesidade (entendida coma un IMC superior a 30). Porén, o dobre (676.000) podería deberse á inactividade física.

Os investigadores, para medir a relación entre a inactividade física e a morte prematura e a súa interacción coa obesidade, analizaron os datos de 334.161 homes e mulleres de toda Europa que participaban no estudo EPIC. Durante unha media de 12 anos, os científicos valoraron unha serie de parámetros: altura, peso e a circunferencia da cintura e unha autoavaliación para medir os niveis de actividade física.

Os resultados amosaron que a maior redución no risco de morte prematura se produciu comparando entre os grupos inactivos e moderadamente inactivos, analizados por unha combinación da actividade no traballo con actividades lúdicas. Cerca dunha cuarta parte dos participantes (22,7%) foron clasificados coma inactivos.

Queimar calorías
Segundo estes resultados, os autores estiman que basta un paseo diario de 20 minutos para 'queimar' paseo entre 90 e 110 kcal, o que faría dunha persona inactiva a ser moderadamente inactiva e reducir así o seu risco de morte prematura entre un 16 e un 30%. Os mellores beneficiados foran as persoas cun peso normal, pero incluso aqueles cun maior IMC tiveron un beneficio.

Para outro dos autores, Nick Wareham, axudar á xente a perder peso pode ser un verdadeiro desafío e, ao mesmo tempo, "debemos ter como obxectivo reducir os niveis de obesidade na poboación, con intervencións de saúde pública que animen á xente a facer pequenos cambios, pero reais, na actividade física que poden ter beneficios significativos para a saúde e poden ser máis fáciles de lograr e manter".

Fonte: abc.es

Publicado en Novas

O número de nenos con sobrepeso ou obesidade infantil creceu nos últimos anos e actualmente hai cerca de 42 millóns de nenos con este problema, segundo datos de 2013 da Organización Mundial da Saúde (OMS), que prevé que a cifra case se duplique nos próximos 10 anos e chegue aos 70 millóns de nenos en 2025.

A prevalencia, segundo un documento deste organismo de Nacións Unidas, está aumentando en todos os países e de maneira máis rápida en países con medios e baixos ingresos. De feito, en África pasouse de 4 millóns de nenos con sobrepeso e obesidade en 1990 a 10 millóns en 2013; e globalmente pasouse de 31 millóns en 1990 a 42 millóns en 2013.

Desde este organismo internacional recordan que a obesidade infantil está asociada cun gran número de complicacións para a saúde e, en consecuencia, a elevar o risco de aparición de enfermidades crónicas de maneira prematura como son a diabetes e as enfermidades do corazón.

"Existen moitas causas e posibles solucións a este problema, pero, como é o caso de todas as estratexias de saúde pública, hai moitos desafíos para a súa implementación", observa o documento que avoga por "unha combinación de alianzas coa comunidade, o apoio dos gobernos e da investigación científica". 

Co obxectivo de buscar unha estratexia baseada na evidencia científica dos beneficios da dieta sa e a actividade física na prevención das enfermidades non transmisibles e os seus factores de risco, incluíndo o sobrepeso e a obesidade, a Asemblea da OMS adoptou o pasado ano unha serie de resolucións pensadas en "informar e modelar unha resposta integral" á obesidade infantil.

Unha estratexia en 2016
Así se estableceu unha Comisión de alto nivel formada por 15 expertos recoñecidos que analizan as deficiencias das estratexias existentes, co fin de "crear conciencia e dar impulso á acción para facer fronte á obesidade infantil". A Comisión apóiase, a través do Director Xeral, en dous grupos de traballo: un comprendido por 21 expertos que basea o seu traballo na investigación e, outro, de 24 expertos que desenvolver a execución e rendición de contas.

Polo momento, "a Comisión encargouse da preparación dun informe especificando os enfoques e as combinacións de intervencións que poidan ser máis eficaces na loita contra a obesidade infantil e en adolescentes en contextos diferentes de todo o mundo".

O informe final, que pretende concluírse coa Estratexia Integral contra a obesidade infantil, cun marco de rendición de contas e opcións políticas para facer fronte a esta crecente epidemia, espérase entregar ao Director Xeral da OMS en 2016.

A primeira reunión da Comisión tivo lugar en Xenebra os días 17 e 18 de xullo de 2014; a segunda prevese que teña lugar en xaneiro de 2015; e, tras esta reunión, a Comisión poderá formular recomendacións preliminares, e examinaranse cuestións específicas relacionadas coa investigación.

Ditas recomendacións cobren as áreas relacionadas coas consecuencias sanitarias, sociais e económicas da obesidade infantil; a importancia dun enfoque de ciclo de vida para a prevención da obesidade infantil; e accións a ser implementadas para previr a obesidade infantil.

Ademais, como parte do seu método de traballo, a Comisión leva a cabo consultas exhaustivas por rexións. Este ano xa está prevista unha consulta para a rexión de Europa, en abril de 2015; para a Rexión do Pacífico Occidental, en marzo e abril de 2015, e da Rexión do Mediterráneo Oriental a principios de 2015.

Fonte: Europa Press

Publicado en Novas

O sedentarismo e la falta de actividade física son máis culpables do sobrepeso e a obesidade dos españois que as calorías que inxiren na súa dieta, que se compón de máis graxas e proteínas das recomendadas pola Autoridade Europea para a Seguridade Alimentaria (EFSA), pero de menos hidratos de carbono.

É a conclusión do estudo de Antropometría, Inxestión e Balance Enerxético en España (ANIBES), elaborado pola Fundación Española da Nutrición (FEN) en colaboración con cinco expertos científicos para coñecer os patróns alimentarios dos españois e o seu gasto de enerxía.

O estudo, no que participaron 2.009 persoas, indica que os españois consumen de media cerca de 800 calorías menos que en 2010, ao pasar a unha inxestión diaria de 2.609 a 1.820, moi inferior tamén á que reflicten os datos dispoñibles do ano 1964 cando era de 3.008.

Os expertos indican, no entanto, que os estudos de 2010 e 1964 se fixeron cunha metodoloxía diferente e "de menor precisión" que esta análise.

Nesta investigación liderada pola FEN, participaron a Academia Española de Nutrición (AEN), a Sociedade Española de Nutrición (SEN), a Sociedade Española de Nutrición Comunitaria (SENC), a Fundación para a Investigación Nutricional (FIN), a Asociación de Estudos Nutricionais, e o Grupo de Investigación en Nutrición, Exercicio e Estilo de Vida Saudable, coa colaboración de Coca Cola.

Neste sentido, o presidente da FEN e membro do Comité de Expertos de Galicia Saudable, Gregorio Varela-Moreira, asegurou na presentación desta investigación que a pesar de que a inxestión de calorías é menor ano tras ano, cada vez hai máis nenos e adultos con problemas de sobrepeso e obesidade e se ben insistiu en que hai que ser "moi coidadosos" coa dieta, dixo que se trata "aínda máis" dun problema do gasto enerxético.

Segundo a última Enquisa Nacional de Saúde do Instituto Nacional de Estatística (INE) de 2013, o 41,3% da poboación non desenvolve ningún tipo de actividade física.

Por sexos, os rapaces só acadan o 85% da recomendación media de calorías, fixada en 2.256, os adultos, o 89,6% de 1.978 e os homes de idade avanzada, o 88,1% de 1.758.

No caso das mulleres, as adolescentes cumpren as recomendacións nun 85% (deberían inxerir 1.887), as adultas nun 92,3% de 1.657 e as de maior idade consumen o 90,1% das aconselladas, que son 1.466.

Perfil calórico desequilibrado
Os expertos que participaron no estudo estiman que o "perfil calórico" dos españois está "desequilibrado", xa que hai un exceso no consumo de graxas e proteínas, pero ao mesmo tempo unha inxestión de hidratos de carbono menor á recomendada.

Cereais, carne e aceite de oliva son tres dos grupos e subgrupos de alimentos que máis contribúen á inxestión calórica dos españois, seguidos de produtos de pastelería, embutidos ou leite.

A EFSA propón que entre o 45% e o 60% da inxestión total de nutrientes se compoña de hidratos de carbono e o estudio ANIBES mostra que o consumo medio é de 41,5%.

As graxas constitúen o 38% das calorías, cando deberían ser menos do 35%, e as proteínas o 17%, aínda que non deberían supoñer máis do 12%.

O presidente da FEN advertiu de que os niveis actuais de inxestión de enerxía non se poden reducir máis sen poñer en risco o consumo en cantidade suficiente dalgúns nutrientes, como minerais e vitaminas, polo que insistiu na necesidade de modificar o estilo de vida para aumentar o gasto enerxético.

Fonte: Axencia Efe

Publicado en Novas

Practicar ioga mellora os factores de risco asociados coa enfermidade cardiovascular e podería ser un "tratamento potencialmente efectivo" para esta enfermidade. Asegúrao unha revisión sistemática de 37 ensaios controlados aleatorios con 2.768 suxeitos realizada por un equipo de investigadores dos Países Baixos e EEUU, que sinala que o ioga pode proporcionar os mesmos beneficios no control de factores de risco que actividades físicas tradicionais como montar en bicicleta ou camiñar a paso lixeiro.

"Este achado é significativo para persoas que non poden ou prefiren non realizar exercicio aerobio tradicional, porque aínda poderían lograr beneficios similares na redución do risco cardiovascular, explican nun artigo do European Journal of Preventive Cardiology.

Algúns estudos demostraron que o ioga resulta eficaz na mellora dos factores de risco cardiovasculares. Esta meta-análise avaliou esta evidencia e proporciona unha estimación realista da eficacia do ioga se se compara co exercicio e coa inactividade física. Os resultados mostraron que os factores de risco para a enfermidade cardiovascular melloraron máis naqueles que facían ioga que nos que non practicaban exercicio e, ademais, que o ioga tivo un efecto nestes riscos comparables a realizar actividade física tradicional.

Colesterol
Cando se comparou coa inactividade física, o ioga asociouse cunha melloría significativa en cada un dos resultados primarios dos factores de risco medidos: o índice de masa corporal reduciuse en 0,77 kg/m2; a presión arterial sistólica baixou 21 mm Hg; a lipoproteína de baixa densidade (colesterol malo) reduciuse en 12,14 mg/dl, e a lipoproteína de alta densidade (colesterol bo) aumentou en 3,20 mg/dl.

Tamén se apreciaron cambios significativos observados nas variables secundarias: o peso corporal reduciuse en 2,32 kg, a presión arterial diastólica en 4,9 mm Hg, o colesterol total en 18,48 mg/dl, e a frecuencia cardíaca en 27 latidos/min. Porén, non se encontraron melloras nos parámetros da diabetes (glicemia en xaxún e a hemoglobina glicosilada).

As melloras nos factores de risco (IMC, presión arterial, niveis de lípidos) foron significativas cando se utilizou o ioga xunto a medicación. Entre os pacientes con enfermidade coronaria existente, o ioga proporciona un beneficio estatisticamente significativo na redución do colesterol LDL cando se engade á medicación (estatinas e fármacos hipolipemiantes).

Menos estrés
En comparación co exercicio en si, viuse que o ioga proporcionaba efectos comparables sobre os factores de risco aos do exercicio aerobio. Os investigadores sinalan que isto podería ser a causa do impacto do ioga na redución do estrés, "que leva a un impacto positivo no estado neuroendocrino, metabólico e a función cardio-vagal".

As similitudes do efecto do ioga e do exercicio sobre os factores de risco cardiovasculares, din os investigadores, "suxiren que podería haber mecanismos comparables de funcionamento, con algúns posibles beneficios aerobios fisiolóxicos que se producen coa práctica do ioga e algún efecto de relaxación para reducir o estrés que ocorre co exercicio aerobio".

Segundo a autora principal, Myriam Hunink, do Centro Médico da Universidade Erasmus, en Rotterdam, e a Escola de Saúde Pública de Boston de Harvard, estes resultados indican que o ioga pode ser moi útil para reducir o risco e que a evidencia apoia a aceptabilidade do ioga para "os pacientes con menor tolerancia física, como aqueles con condicións cardíacas preexistentes, os anciáns ou aqueles con dolor musculoesquelética ou nas articulacións".

Os autores do traballo conclúen que o ioga ten o potencial de ser unha estratexia de tratamento e prevención rendible dado o seu baixo custo, ao non necesitar un equipo caro ou tecnoloxía, con potencial dunha maior adherencia e unha maior calidade de vida, ademais de ser accesible para grupos poboacionais máis grandes.

Fonte: ABC

Publicado en Novas

Chega a época do Nadal e os excesos nas comidas poden pasar factura, sobre todo aos niveis de colesterol. Estímase que durante estas festas os españois gañen de media entre dous e tres quilos de peso e poden incrementar os seus niveis de colesterol ata un 10%. Por iso hoxe achegamos algunhas solucións para manter a raia o colesterol, así coma as claves na súa prevención e tratamento e consellos para coidar a saúde no Nadal.

O descontrol no comer e o beber durante as festas pasan factura á saúde. E non só co aumento de peso, que se cifra entre dous e tres quilos de media, senón nun dos seus acompañantes habituais:o colesterol malo. Este é o colesterol que se une a unha lipoproteína de baixa densidade (LDL), encargada de transportar o colesterol desde o fígado a todas as células do organismo e, da mesma maneira, o que se deposita na parede das arterias, onde forma as temidas placas de ateroma.

Por este motivo, os excesos cometidos durante estes días de Nadal, con banquetes ricos en graxas e calorías, sen esquecer que é unha época propicia para os descoidos da medicación crónica, poden incrementar o risco cardiovascular. Segundo a Fundación Española do Corazón, FEC, nestas datas poden aumentar ata un 10% os niveis de colesterol. Ademais, consumir máis graxas saturadas durante uns días está asociado a un relaxamento que pode provocar a perda dos bos hábitos dietéticos establecidos durante o resto do ano e facer que, unha vez finalizadas as festas, se perpetúe unha pauta inadecuada de alimentación.

Aínda que os especialistas animan a desfrutar das comidas destas celebracións, hai que ser coidadosos para no levar un bo susto despois das festas. O mellor é ser consciente do que se inxire: non hai que comelo nin bebelo todo. Pero, como controlar o colesterol?

Controlar o colesterol
Manter a raia o colesterol é fácil. Basta con seguir unhas sinxelas pautas dietéticas para restrinxir a inxestión de graxa, sobre todo a saturada, que é un dos nutrientes que máis o incrementa.

- Antes de cociñar a carne de ave, é mellor quitar a pel. Se non é posible, retirala antes de comer. É un dos lugares onde máis se almacena este tipo de graxa.

- Evitar cociñar con manteiga ou nata e preferir o aceite de oliva, que é unha graxa cardiosaudable.

- Optar polos lácteos e derivados desnatados e polos queixos con baixo contido en graxa. Os lácteos enteiros e os queixos curados son moi ricos en graxas saturadas.

- Limitar ao máximo os embutidos, aperitivos salgados, salsas, bolos industriais e alimentos precociñados.

Os especialistas da FEC estiman que escoller de maneira adecuada os alimentos axuda a reducir ata un 50% a inxestión de colesterol e un 74% as graxas saturadas ao longo do día. Engaden que a vitamina C dalgunhas froitas (melón, fresas, kiwi e cítricos en xeral) e verduras (tomate, pemento, col e coliflor) ten un papel protector nas enfermidades cardiovasculares e que os lácteos con esterois vexetais axudan a reducir os niveis de colesterol.

Para previr e tratar o colesterol, hai dous puntos clave recoñecidos pola comunidade científica. Por un lado, está a adopción dunha alimentación equilibrada sen graxas saturadas, como a dieta mediterránea, onde a achega de graxa provén, basicamente, dos ácidos graxos monoinsaturados e poliinsaturados do peixe (sobre todo, azul) e o aceite de oliva. É importante non esquecer o papel que xogan as verduras, hortalizas e froitas, os legumes, os cereais (mellor integrais) e os froitos secos (ricos en fibras, vitaminas, minerais e antioxidantes).

Por outro lado, a práctica de exercicio físico aerobio (camiñar, nadar, correr...) de tres a cinco veces por semana, que ademais de axudar a manter un peso adecuado e a previr a obesidade, demostrou aumentar o colesterol bo (HDL) e diminuír a porción prexudicial, LDL. Realizar actividade física de intensidade moderada, como camiñar a bo ritmo, é beneficioso cando se practica durante polo menos 30 minutos a maior parte dos días. Porén, tal e como advirten desde a American Heart Association (AHA), a inactividade física contribúe ao desenvolvemento de obesidade, hipertensión arterial, baixos niveles de colesterol bo e diabetes, todos factores de risco cardiovasculares.

Ante un diagnóstico médico de colesterol e só se a dieta e o réxime de actividade física non achegan os resultados esperados, o médico establecerá tratamento farmacolóxico, que é distinto segundo o tipo de dislipemia que sufra a persoa (hipercolesterolemia, hipertrigliceridemia ou ambos).

Fonte: 20 minutos

Publicado en Novas

A Axencia Española de Consumo, Seguridade Alimentaria e Nutrición vén de publicar os resultados do Estudo Aladino 2013. Segundo este informe, o 43% dos nenos entre sete e oito anos padecen sobrepeso. Aínda que é un dato alarmante, a cifra é menor que en anos anteriores, producíndose unha tendencia á baixa.

A través da Estratexia NAOS, AECOSAN elaborou este estudo en base a unha mostra de 3.426 nenos e nenas de sete e oito anos de idade, representativa de todo o territorio nacional. Encádrase no sistema de vixilancia epidemiolóxica da obesidade infantil en Europa, no marco da Rexión Europea da OMS. A participación en dito sistema de vixilancia é un eixe clave do Observatorio da Nutrición e Estudo da Obesidade.

Os datos, se ben indican que o predominio do exceso de peso entre os máis pequenos segue sendo alta, mostran unha tendencia descendente nos últimos dous anos. O Estudo Aladino 2013 sinala que o sobrepeso infantil se estabilizou en torno ao 25%, pero cun lixeiro descenso, xa que no 2011 era do 26,2%. En canto ao predominio da obesidade infantil, en 2011 foi do 19,1%, fronte ao 18,4% de 2013. En suma, o exceso de peso afecta ao 43% dos escolares desta franxa de idade, cando fai dous anos a porcentaxe ascendía ao 45,3%. Isto supón un descenso de 2,3 puntos.

Dos posibles factores asociados á obesidade, os que se relacionaron de forma significativa son: non almorzar a diario, dispoñer de televisión ou DVD na habitación, ver a televisión durante máis de dúas horas diarias, durmir menos horas das recomendadas, ter pais fumadores (especialmente se fuman ámbolos dous), baixo nivel de ingresos económicos da familia e baixo nivel educativo dos pais.

A obesidade infantil segue sendo hoxe en día un importante problema de saúde pública, cuxo predominio aumenta a nivel mundial. En concreto, o predominio global de sobrepeso e obesidade en nenos de cero a cinco anos en 1990 era de 4,2 %, en 2010 de 6,7 % e a Organización Mundial da Saúde (OMS) estimou que en 2020 sería do 9,1 %. En España, segundo os datos do Estudo Aladino realizado en 2010 e 2011 en nenos de seis a nove anos de idade, e empregando as curvas de crecemento da OMS, o predominio de obesidade era do 18,3%.

Teresa Robledo, vocal asesor da Estratexia NAOS, considera que "aínda que as cifras seguen sendo importantes, esta tendencia debe animar a mirar cara o futuro e impulsarnos a redobrar esforzos para reverter definitivamente a tendencia crecente da obesidade infantil. É necesario combater a obesidade e, para iso, podemos realizar pequenos cambios nos nosos hábitos de vida. Se eliximos mellor o que comemos, se os produtos que consumimos son nutritivos e equilibrados, se facemos deporte e nos mantemos activos, a nosa saúde será mellor no presente e no futuro".

Fonte: Munideporte

Publicado en Novas
<< Inicio < Anterior 1 2 3 4 5 6 7 8 9 10 Seguinte > Final >>
Páxina 1 de 13